La comuna de Mailís, situada enter lo Mont de Marsan e Dacs, qu’afronta ua seria de panatòris repetits de son panèu d’entrada, ce rapòrta France Bleu. La purmèra consolessa, Anne-Marie Lailheugue, que suggereish que la popularitat deu prenom "Mailís", tradicionau a las Lanas, que motiva aqueths panatòris, dilhèu entà servir de soviéners. Maugrat los investiments de la comuna, dab cada panèu de 300 èuros, los panatòris que persisteishen. Anne-Marie Lailheugue que mençona qu’un panèu ei estat sagerat, mes daubuns que contunhen de desfidar aquera mesura en utilizant metòdes inacostumats.

Totun, l’investigacion que’s truca a dificultats, pr’amor que los panaires dèishan pas nada traça ni indici. L’elegida que soslinha las consequéncias juridicas deu panatòri, en hasent referéncia a l’article 311-3 deu còdi penau, qui preved dinc a tres ans d’empresoament e 45 000 èuros d’emenda. Maugrat aquò, las motivacions darrèr d’aqueths actes que demoran misteriosas e que semblan persistir maugrat las mesuras presas per la comuna.

Que’s poiré d’ara enlà temptar de méter la senhalizacion de la comuna en occitan entà véder si la motivacion deus panaires persisteish e, si tau ei lo cas, arrevitar la volontat de mantiéner vius los noms pròpris en la lenga deu país.

JR