Aquesta dimenjada avián luòc los ueitens de finala de la Copa Lòrd Derby .

Dissabte, Limós s’anava impausar a Entraigas 54-6 alara que Vilagalhenc opausava una bèla resisténcia als Tigres d’Albi (18-34).

Dimenge, Selon podiá pas res fàcia a Avinhon (0-82). Lesinhan preniá la mesura d’Illa (24-0). Vilanòva capitava de ganhar a l’Escura 16-14 e St Gaudenç emportava la victòria dins las darrièras minutas a Vilafranca: 34-30.

Meteissa marca per una partida plan disputada a Tolosa que vesiá la victòria dels vesitaires Dragonets al punt en aur. L’autra oposicion entre formacions d’Elèit 1 virèt a una partida de sens unica que permetèt a Carcassona d’eliminar Pià: 52-0.

Los quarts de finala se tendràn a la debuta de març (dissabte 9 e dimenge 10).

Represa del campionat

La primièra jornada de las partidas venir del campionat d’Elèit 1 se tendrà:

• aqueste dissabte 13 amb las partidas Avinhon-Carcassona, Vilanòva-Tolosa e Albi-St Gaudenç

• e aqueste dimenge 14 amb los dèrbis Limós-Lesinhan e Pià-Dragonets.

Nafradura e recrutament cò dels Dragons

Del costat de Perpinhan, òm se pausa de questions sus las possibilitats de jogar del segonda-linha Manu Ma’u que deuriá èsser operat del pè, çò que complicariá bravament son retorn sus las pelenas.

Lo club a fait signar lo menaire de jòc d’Hull KR Jordan Abdull jos forma d’un prèst d’una annada. Pòt jogar mesclanha o dobertura, mas instrumentar tanben coma talonaire e, eventualament, coma arrièr. Al mitan del terren, la concurréncia va èsser bèla amb Tèo Fages, Jayden Nikorima o Cesar Rougé. Demòra d’esperar qu’aquò siá profeitós a la formacion catalana.

XIII-cadieral: un documentari sus Canal+

L’Oèst foguèt mai fòrt dissabte, dins la partida nomenada de las Originas que se debanava a Marselha: la seleccion de l’Oèst venç los jogaires de l’Èst: 52-37.

Aquesta setmana, se poirà veire sus Canal + lo reportatge sus l’oposicion entre las formacions anglesa e francesa a la Copa del Mond passada en fasent a l’encòp un istoric de la disciplina. Aquel documentari, entitolat Made of Steel (Fait d’acièr), passarà sus una de las cadenas de Canal+ aqueste dijòus 11 (23h) e aqueste dissabte 13 (20h55).