Actualitats
Un navèth rei en Euròpa de sang bearnesa
Frederic de Danemarc, qui accedirà au tròn aqueste dimenge 14 de genèr au castèth de Christiansborg, qu’ei ja comte de Montpesat com descendent d’ua grana familha bearnesa
Lo linhatge bearnés deus Labòrda de Montpesat (Vic Vilh) que perdurarà en çò deus reis de Danemarc quan, aqueste dimenge vienent, lo prince Frederic accedesca au tròn, ce rapòrta Sud-Ouest. Lo futur Frederic X qu'ei lo hilh de la reina Margalida IIu e deu prince consòrt Enric de Danemarc, vadut a Talença (la Grava) dab lo nom d'Enric de Labòrda de Montpesat e arrèrhilh d'aquera aristocratica familha d'origina bearnesa. En efèit, lo prince Frederic que pòrta desempuish l’an 2008 lo títol de comte de Montpesat, quan la soa mair lo creè entaus hilhs en memòria e aunor a las originas deu pair. D'ara enlà, los Montpesat que seràn tanben los reis de Danemarc.
Los Labòrda de Montpesat que tròban las lors originas hens ua influenta familha bearnesa anoblida a partir deu sègle XVII. Enric de Montpesat qu’encontrè la futura reina de Danemarc a Londres, mentre que tribalhava com secretari de l'ambaishada de França; era qu'estudiava las sciéncias politicas a la prestigiosa Escòla d'Economia de la capitau britanica. Que's maridèn en 1967 a Copenaga, sagerant atau la perpetuacion d'un linhatge bearnés au còr de la corona danesa.
JR
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Cerquètz pas, Sénher Bardòu. Es lo mariòl que s'es tirada la fava a l'epifania…
Qu'es aqueste mariòl ? E qué nos pòt far, a nosautres, çò que los Daneses son pro someses per o li permetre ?
Los bearneses seràn lèu de totas las familhas reialas d'Euròpa! Danemarc, Suèda e lèu Anglatèrra, que d'unes preveson lo maridatge d'una cèrta Mailis (qu'actualament tòrna far la decoracion de sa cambra amb de panèls de la DDE 40) amb lo Jòrdi, prince de Gàllia, qu'a 10 ans comença ja a pensar a sa succession, un còp que Papet e Papà li auràn daissat la plaça.
Bon fin finala pas besonh de debatre sus la question de l'autonomia d'Occitània, la solucion la vaqui : VISCA LO REI !
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari