L’Observatòri de Nauta Provença, situat a Sant Miquèu de l’Observatòri (Forcauqueirés) a recentament descobèrt una exoplaneta rara, çò rapòrta La Provence. Nommada HD88986b, es dos còps mai granda que la Tèrra e se tròba a 109 annadas-lutz de nòstra planeta. Aquela sos-Neptun presenta una caracteristica excepcionala amb sa febla temperatura (190˚C) en relacion a la distància amb son estela. Las observacions efectuadas sus un periòde de 25 ans an confirmat sa preséncia e sas caracteristicas, coma sa talha 17 còps mai massissa que la Tèrra o son orbita de 146 jorns a l’entorn de son estela.

Gràcias a las avançadas tecnologicas de l’espectrograf SOPHIE+ installat sul telescòpi de 193 cm de l’observatòri de Sant Miquèu, deuriá èsser possible d’analisar l’atmosfèra d’HD88986b pendent sos transits davant son estela. Aquò poiriá ofrir d’informacions crucialas sus la composicion de son atmosfèra, contribuissent aital a la compreneson dels mecanismes de formacion dels sistèmas planetaris.

Los cercaires, entosiastas pertocant la descobèrta d’aquela exoplaneta freja, soslinhan l’importància de melhor comprene aquelas extra-Tèrras e sos-Neptuns, que son d’objèctes d’un interès bèl per l’estudi de las exoplanetas dins nòstra galaxia.