En mar Roja, las atacas contra los vaissèls de transpòrt pels rebèls houthis de Iemèn an entraïnadas de consequéncias economicas limitadas fins ara, çò rapòrta Sud-Ouest. Mai o mens lo 12 % del comèrci maritim mondial passa normalament per l’estrech de Bab Al Mandeb, mas dempuèi mièg novembre, lo nombre de contenedors es tombat d’un 70 %. Fòrça entrepresas an interromput lor trafec dins la region, en optant per un itinerari mai long e car a l'entorn del cap sud-african de Bona Esperança.

En mai, la secada al canal de Panamà a alentit lo transit dels vaissèls entre Asia e los Estats Units. Mai d’una entrepresa, dont Ikea e Tesla, an anonciats de retards dins lor produccion a causa de las perturbacions dins las vias maritimas. Las companhiás maritimas an aumentadas las tarifas per cobrir los còstes ligats a la crisi, en entraïnant una auça potenciala dels còstes del transpòrt maritim d’un 60 %.

Aquelas perturbacions fan crénher una inflacion renovelada, avalorada a 0,7 ponch suplementari d'inflacion mondiala d'aicí a la fin de 2024, segon Oxford Economics. Los expèrts soslinhan que la durada de la crisi determinarà l'amplor dels impactes economics, e malgrat que contornejar Africa siá mai car e mai long, lo problèma es actualament considerat mai coma seguritari que logistic. Las autoritats susvelhan de près l'evolucion de la situacion per avalorar las eventualas consequéncias suls prèses de l'energia e l'inflacion.

Los huthis son una organizacion armada, politica e teologica zaidita nommada aital en l'onor del comandant Ḥusayn Badr Al Dīn Al Ḥūthī, tuat per las fòrças armadas iemenitas en setembre de 2004. Dempuèi la debuta de l'insurreccion fa 20 ans, los rebèls son arribats de contrarotlar de vastas zònas de Iemèn dont profièchan ara per ajustar de pression al conflicte  de l’Orient Mejan.