Lo 15 de genièr passat, Tolosa aculhiguèt la 8a edicion del campionat del Mond de caçolet al Rex, çò rapòrta Actu Toulouse. Organizat pel duo comic Les Chevaliers du Fiele presidit pel cap cosinièr Michel Sarran, lo concors metiá en competicion cinc establiments pel títol del melhor caçolet del Mond. Los participants èran la Maison Garcia de Tolosa, En Marge d’Aurevila, Chez Christine de Carcassona, Le Bon Vivre de Tolosa e Chez Marty Cassoulet & Cie de Castèlnòu d’Arri.

Jean-Baptiste Marty de Chez Marty a emportat lo títol, succedissent aital a Romain Brard, cap del restaurant mondin Le Genty Magre, laureat en 2023. Lo public poguèt tastar las cinc preparacions e a atribuit lo prèmi del public a la Maison Garcia. Castèlnòu d'Arri es estada designada coma la novèla capitala mondiala del caçolet.

Segon la legenda raportada per Prospèr Montanhièr, l'origina del caçolet remonta a la vila de Castèlnòu d'Arri pendent la Guèrra de Cent Ans (1337-1453). Pendent lo sètge pels angleses, los abitants afamats aurián amassats totes los viures disponibles, sustot de favas e de carn, per aprestar un enòrme ragost o estofat per tal de tornar l'energia als combatents. Gràcias a aquel plat, los assetjats an capitat a rebutar los angleses e liberar la vila. A l’ora d’ara, Castèlnòu d'Arri, Tolosa e Carcassona se disputan l'origina del caçolet. Caduna de las vilas a una recèpta pròpria amb d'ingredients diferents.