La justícia tunisiana a ordenat la libertat de l’activista Amina Asbui, militanta del grop feminista internacional Femen. L’acusan d’aver profanat una sepultura per aver escrich lo nom del grop feminista sus la paret d’un cementèri a Cairoan, a qualques 150 quilomètres al sud de Tunis. La tòca del tag èra de denonciar una reünion salafista que se debanava près d’ailà. La decision de la liberar a quitament estonat los avocats de la joventa.
 
L’activista l’an mesa en libertat, après èsser en preson preventiva dempuèi lo mes de mai. Amina Asbui (tanben coneguda coma Amina Tyler) venguèt coneguda al començament de l’an, après mostrar sas popas sus Internet per denonciar la morala conservatritz del sieu país. Aquò provoquèt una granda polemica entre las associacions civilas, que la defendèron, e los grops radicals islamistas, que critiquèron son comportament. Lo president d’una organizacion civila salafista assegurèt que la femna meritava de “recebre entre 80 e 100 foetadas”. “Çò que faguèt despassa e es mai grand qu’aquò, e donc merita d’èsser lapidada fins a la mòrt”, çò apondèt lo religiós.
 
La detencion e l’empresonament d’Amina, pr’amor pel tag sus la paret del cementèri, generèt un ample movement de solidaritat per tot lo Mond, en tot denonciar lo conservatisme de l’actual govèrn islamista del partit An Nahda (Ennahda). La crispacion venguèt encara mai granda quand tres militantas europèas de Femen foguèron detengudas en Tunisia après mostrar lors popas en public coma gèst de sosten a Amina. Foguèron detengudas, condemnadas a dos meses de preson e, pauc après, mesas en libertat.