D’actors de l'ensenhament lingüistic del Bascoat e d'Occitània manifestèron dimècres 24 de genièr a Pau, davant lo sèti de l’Inspeccion Academica, per defendre l’ensenhament de lors lengas, çò rapòrta Mediabask. Del costat occitan i aviá de representants de Calandreta, d’Òc-Bi e del CRÈO, e del caire basco Seaska, Biga Bai, Ikas-Bi, Euskal Haziak, Euskara Geroan, Azterketak Euskaraz e Ikas.

Denonciavan los obstacles persistents dins l'ensenhament de las lengas, sustot pertocant lo passatge dels examens en basco e en occitan, e se planhián de l’actitud ostila a las lengas autoctònas de la rectritz de l'acadèmia de Bordèu, Anne Bisagni-Faure, qu’auriá requist que las questions de las espròvas del Diplòma Nacional del Brevet (DNB) foguèsson redigidas exclusivament en francés. Tot aquò se podiá legir dins una letra que los manifestants adreicèron a la nòva ministra de l'educacion, Amélie Oudéa-Castéra. Dins la letra se soslinha tanplan que la decision de la rectritz a una repercussion sul nombre d'escolans que causisson l'ensenhament en basco o occitan. Per tant, fan una crida a l'estabilizacion e a la perennizacion dels examens en aquelas lengas.

A mai, chepica egalament los ensenhaires una anóncia que la faguèt lo primièr ministre, Gabriel Attal, quand èra ministre de l'Educacion,  que voliá adaptar l'organizacion dels corses de matematicas al collègi en foncion del nivèl dels escolans per la rintrada venenta. Sabon pas cossí se poirà organizar en basco o en occitan, essent qu’un sol professor per collègi pòt intervenir en una lenga autra que lo francés.

Parisen ez, Bordelen (Okzitania) da blokeoa. Hala uste dute Euskal Herriko eta Okzitaniako hizkuntza gutxituetako irakaskuntza eragileek. Eta argi izendatu dute erantzulea: Anne Bisagni-Faure Bordeleko akademiako errektorea. @seaskaikastola@berriahttps://t.co/y8KN3XB4ao

— Ekhi Erremundegi (@EkhiErremundegi) January 24, 2024