Aqueste dissabte 3 de febrièr, los Dragons Catalans prepararàn la sason de Superliga per un rescontre fàcia a una seleccion de jogaires d’Elèit 1, dita XIII del President. La partida se tendrà a 3 oras del vèspre a l’estadi Brutus abans una serada festiva ont se veirà d’imatges de la sason passada e ont se presentarà l’efectiu actual.

Lo club a renduda publica la lista dels numèros dels malhòts dels jogaires, çò que pòt balhar una idèa de la formacion tipe. S’òm pren la numerotacion al pè de la letra, l’esquipa de basa seriá aquesta:

A l’arrièr: Artús Morgue ; en tres quarts, son tres per doas plaças a las alas Tom Davies, Tom Johnstone e Fouad Yaha; Artús Romano e Matieu Laguèrra al centre; en mièges: Jayden Nikorima e Tèo Fages ; en primièra linha: Mike McMeeken e Julian Bosquet coma pilars amb Micky McIllorum al talonatge; Tariq Sims e Pau Seguièr en segonda linha e lo capitani Benjamin Garcia en tresena linha.

Alix Da Costa, Bayley Sironen, Roman Navarette e Cesar Rougé poirián pretendre d’èsser sul banc.

Mas, de segur, lo centre Matt Ikuvalu, lo mièg Jordan Abdull, los pilars Jordan Dezaria e Chris Satae pòdon, eles, pretendre de jogar dins l’esquipa tipe. Serà probable malaisit, quand se vei la politica de l’entraïnaire a respècte dels jogaires occitans e catalans, a Ugo Tison, Tanguy Zenon o Loan Castano de se trapar sus la pelena. Auràn benlèu l’escasença d’anar portar ajuda a Tolosa. Enfin, dos nafrats bèls son dins la tièra: Siua Taukeiaho e Manu Ma’u. Se sap pas se poiràn jogar e, per ora, blòcan las possibilitats de refòrts.

Un club dins l’economia locala

Los Dragons venon de signar un acòrdi de partenariat amb l’entrepresa nòrd-catalana de Les Toiles du Soleil. L’entrepresa prendrà en carga la decoracion del salon de recepcion dels partenaris e prepausarà a la botiga una tièra d’articles a las colors del club e de Catalonha. De produits e una decoracion que seràn en plaça per la recepcion de Warrington lo dissabte 17 de febrièr.

Los joves del Campus, lo centre de formacion del club, organizan una tombòla dins l’encastre de la campanha Don’actions al benefici del Secors Popular.

Aquò es lo positiu, mas lo cònsol màger de Perpinhan a sasit l’escasença dels vòts per dire als Dragons e a l’USAP que las caissas de la vila lor i èran pas dobèrtas en grand e que l’espòrt professional costava car a la collectivitat? En consequéncia, lor i caldriá trapar los mejans de pagar elesmeteisses cèrts còstes.

Quatre partidas de la dotzena jornada

Aprèp la partida St Gaudenç-Dragonets jogada aqueste dimenge e ganhada pels catalans 28-10, las autras quatre partidas de la dotzena jornada del campionat se debanaràn (en principi) aquesta dimenjada:

• dissabte: Avinhon reçauprà Lesinhan; Albi reçauprà Tolosa.
• dimenge 4: Carcassona anirà a Pià e Limós se desplaçarà a Vilanòva.