Las universitats de Bearn,del Bas Ador e dels Bascoats Nòrd e Sud an presentat l'Institut de Cooperacion Transfrontalièra (ICT), una aisina que permetrà de facilitar las relacions. L’ICT se presentèt lo 26 de genièr al campus de Niva, a Baiona, en amassant los presidents e directors de las universitats de Pau e dels Païses d'Ador (UPPA), de Navarra (UPNA), e del Bascoat (UPV/EHU). Sa tòca es de metre la sciéncia universitària al servici d'una cooperacion transfrontalièra mai eficaça, tant per las politicas publicas coma pel sector privat. Segon lo conselhièr regional Mathieu Bergé, se considèra aquel projècte concebut per “levar los obstacles transfrontalièrs” dins l’encastre universari poiriá quitament entraïnar un aument del PIB, çò rapòrta Mediabask.

L'ICT s'engatja a melhorar las coneissenças dels professionals de la cooperacion transfrontalièra pel biais de formacions, e a fornir de responsas scientificas a las problematicas dels dos costats dels Pirenèus. Lo primièr projècte de l'institut pòrta sus un estudi juridic de la fiscalitat transfrontalièra, dont los resultats seràn anonciats dins la prima.

Lo finançament de l'ICT proven del programa europèu Poctefa, amb mai d'un milion d'èuros, valent a dire mai o mens lo 65% del budget total, e un apòrt renovelable de 60 000 èuros de l'Euroregion Nòva Aquitània Euskadi Navarra. Inicialament previst sus tres ans fins en 2026, lo projècte a per mira de s'inscriure dins la durada per favorir la cooperacion dels dos caires de la termièra.

Hoy hemos acudido a Baiona para asistir a la presentación del Instituto de Cooperación Transfronteriza universitaria, partenariado financiado por @Euroregion_naen y que ha conseguido fondos europeos @CTPPOCTEFA 👏🏼#NavarraTrasfronteriza#NavarreInEurope🇪🇺 pic.twitter.com/BgsNzUhXXB

— 🇪🇺 Sergio Pérez García 🌏 (@SergioAccionExt) January 26, 2024