Coordenat per Cristian Lagarda, aqueste dorsièr fa lum sus aquela granda figura de l’occitanisme que foguèt Bernat Lasfargas, un grand poèta en occitan e en francés mas tanben un traductor dels mai grands de las literaturas catalana, espanhòla e latinoamericana.

Las contribucions nombrosas e ricas explòran sa biografia, entre las diaspòras parisenca e lionesa (foguèt professor agregat d’espanhòl en classas preparatòrias a Lion), e Peiregòrd (païs de las originas e de la fin de vida), l’engatjament federalista e occitanista mercé las amitats amb la màger part dels grands actors de la renaissença d’òc d’après 1945. Analisan l’òbra poetica e meton en relèu l’importància de la tematica de l’aiga, de la sorsa, lo rapòrt al temps, l’inventivitat de Lasfargas, sa marca personala de poèta entre doas lengas, “doblament poèta e son quite traductor”, coma o escriu Felip Gardy. La revista fa descobrir Lasfargas, lo “Maspero lionés” amb sa librariá Fédérop, puèi editor eclectic a la meteissa ensenha, e traductor prolific, en particular de l’espanhòl al francés (a son tablèu de caça, suls dos continents, Núñez Cabeza de Vaca, Galdós, Juan Goytisolo, Sender, Cela, Llamazares, Borges, Vargas Llosa…) e tanben e subretot dels principals autors contemporanèus catalans (per la pròsa, entre tant, Joan Sales, Mercè Rodoreda, Quim Monzó, Jesús Moncada o Jaume Cabré, e per la poesia Salvador Espriu, Joan Brossa e Àlex Susanna).

La revista Plumas, codirigida per Silvan Chabaud e Maria Joana Verny, nasquèt en 2021 d’un partenariat entre l’Universitat Pau Valèri – laboratòri ReSO e lo CIRDÒC – Institut occitan de cultura.