La polícia marroquina intervenguèt amb duretat la nuèch de divendres a dissabte a Rabat, dins una manifestacion convocada a travèrs dels rets socials contra la mesa en libertat per gràcia d’un pederasta espanhòl a la demanda del rei Joan Carles I. La polícia carguèt contra los manifestants davant lo parlament marroquin en ferissent de desenats de ciutadans, compreses de jornalistas. “Es una vergonha, vendon los nòstres mainatges”, çò planhiá la presidenta de l’associacion Tòques pas mos Enfants, Najia Adib, que cercava de saber “qual es lo responsable real d’aquela gràcia”.
 
Lo cas comencèt dimars, quand la publicacion dins la lista de las gràcias de presonièrs espanhòls de Marròc inclusiá un pederasta que l’avián condemnat a trenta ans de preson. Segon d’informacions de l’agéncia Europa Press, que cita de fonts dels palaises reials espanhòl e marroquin, lo rei Muhammad VI faguèt la lista  en prenent en compte las demandas del rei Joan Carles I, que fa qualques jorns aviá vesitat justament lo monarca marroquin.
 
Après la polemica, lo ministèri espanhòl dels Afars Estrangièrs a dich que son las autoritats marroquinas qu’èran encargadas d’elaborar la lista, que compreniá 48 noms, e mai se lo darrièr nom de la lista es lo del pederasta en question, çò que fa pensar que poiriá èsser estat apondut al darrièr moment. Cal dire tanben que lo rei d’Espanha mercegèt publicament lo rei de Marròc pels indultes pendent la Fèsta del Tròn, d’aquela setmana.
 
D’un autre costat, lo ministre marroquin de la Justícia a confirmat qu’aquel ciutadan espanhòl foguèt condemnat a la preson per aver abusat d’onze menors d’edat. Tanben diguèt que lo pederasta poiriá pas jamai tornar en Marròc. L’avocat de las victimas expliquèt a l’agéncia Reuters que lo graciat es un retirat qu’aviá doas residéncias a Qunaytra (Marròc) e que, fa tres ans, li trobèron qualques vidèos ont se lo vesiá abusar d’enfants qu’avián entre quatre e quinze ans. Segon lo jornal espanhòl El País, aquel pederasta poiriá èsser un èx-espion espanhòl en Iraq.


Crisi granda
 
La polemica qu’a generat aquel afar es granda e las protèstas se multiplican. Talament que lo rei Muhammad VI, que signèt la gràcia, s’es vist obligat de far un comunicat — circonstància plan pauc abituala après tres jorns de protèstas— ont ditz que desconeissiá los crimes del graciat e que s’agís d’una “liberacion lamentabla”. Al delà, Muhammad VI, a anonciat una investigacion per determinar “los responsables d’aquela negligéncia”.
 
Segon qualques mèdias marroquins, i a agut qualques demissions dins lo palais reial marroquin. Per contra, lo palais reial espanhòl, qu’es el que faguèt la demanda formala al rei de Marròc, a dich pas res encara sus l’afar.
 
Pendent tota la dimenjada, davant lo parlament marroquin, la polícia a cargat contra los manifestants que protestavan contra aquel indulte. Las protèstas son arribadas quitament a París, ont dissabte manifestèron de centenats de personas convocadas per l’Associacion Marroquina dels Dreches Umans.

A la seguida d’aquela crisi, lo rei de Marròc anullèt ièr de ser la gràcia. Ça que la, l’espion pederasta espanhòl es ja fugit en Espanha.