Se, aval en China, comença l’annada del Dragon, los sostens esportius dels Catalans espèran qu’en Euròpa serà enfin l’annada dels Dragons e que los Sang e Aur acabaràn aquesta tardor per menar a Perpinhan lo trofèu de la Superliga.

Aqueste dissabte 3 de febrièr, a Brutus, se descobrissiá la formacion novèla dins una oposicion amb lo XIII del President, una seleccion de jogaires d’Elèit 1. Se los Presidents marcavan un ensag tre la primièra minuta, aprèp la formacion de jogaires recampats per dos jorns d’estagi podiá pas res contra de professionals que s’entraïnan amassa dempuèi dos meses. Aquò anava tròp aviat e la circulacion de la palma fasiá virar canturla. Los Dragons marquèron sèt ensages dins lo primièr temps e n’ajustèron uèit dins lo segond. Coma Artús Morgue ensaquèt 14 transformacions sus quinze, aquò balhèt plan de trabalh al prepausat del planchòt per n’arribar a la marca d’88-6.

Se descobriguèt los nòuvenguts: la precision del jòc al pè de Jordan Abdull, lo vam de Jayden Nikorima, la fòrça de Tariq Sims, Bayley Sironen o de Chris Satae.

Lo dissabte 17 de febrièr, per la primièra jornada de la competicion, l’oposicion serà autra amb la venguda dels Lops de Warrington en tèrra catalana.

La jornada esbocinada

Lo cambiament de la data del rescontre amical a espandit la jornada del campionat sus quatre jorns:

• La setmana passada, los Dragonets anavan ganhar a St Gaudenç 28-10.

• Aqueste dissabte 3, Lesinhan mena 24-6 a la pausa a Avinhon, puèi conten lo retorn provençal per véncer 34-28. Albi bat logicament Tolosa 42-18.

• Aqueste dimenge 4, a Vilanòva, lo campion Limós s’impausa 20-12.

• En rason de la seleccion de quatre Canaris, la partida Pià-Carcassona se jogarà la dimenjada del 24 de març.

Quatre rescontres de la tretzena jornada se debanaràn aqueste dissabte 10 de febrièr: un prometeire Lesinhan-Albi, Tolosa-Pià, Dragonets-Vilanòva e Carcassona-St Gaudenç. Dimenge, Limós reçauprà Avinhon.

Festejar los 90 ans de la Federacion

La Federacion a causit de festejar los 90 ans d’existéncia de la Liga, puèi de la Federacion de XIII en França: 90 ans de passion! Una mòstra sul tèma serà realizada. L’operacion es estada lançada a Tolosa e Perpinhan e se perseguirà:

• los 6 e 7 d’abril a Marselha, ont auràn luòc las mièjas finalas de la Copa de França,

• lo dissabte 27 d’abril a Perpinhan per la finala de la Copa,

• lo dimenge 26 de mai a Narbona per la Prima del XIII (finalas de campionats),

• lo 29 de junh a Tolosa, ont se tendràn dos tèstes (femnas e òmes) entre França e Anglatèrra, la velha d’un Tolosa-Featherstone en Championship,

• en octòbre a París, abans un rescontre França-Galas, la mòstra serà presentada pendent una setmana dins los locals del CNOSF (Comitat Olimpic).