Cinc liceans seràn entenduts deman a miègjorn a l’Assemblada Nacionala francesa dins lo grop “Lengas e culturas regionalas”. A aquel meteis moment, i aurà un acamp sus la plaça parisenca d’Édouard Herriot, davant la bastissa parlamentària, que s’i mobilizaràn especialament de jovents d’Occitània, de Corsega, d’Alsàcia, de Bretanha e del Bascoat. L’acamp seguís la crida del collectiu Per que Viscan Nòstras Lengas (PQVNL) qu’es plan inquiet dels mejans insufisents afectats a l’ensenhament en aquelas lengas e d’aquelas lengas, malgrat l'adopcion en abril de 2021 de la lei de proteccion e promocion de las lengas minorizadas, coneguda coma Lei Molac.

Los manifestants vòlon reclamar una evolucion de l'article 2 de la Constitucion francesa, que consagra a l’ora d’ara lo francés coma sola lenga de la Republica, per tal d'obténer un estatut oficial per las autras lengas autoctònas. Dins aquel sens, PQVNL se mòstra preocupat pels dos articles de la lei que los censurèt lo Conselh Constitucional. Concretament, los magistrats considerèron anticonstitucional l’article 4, qu’oficializa la possibilitat d’ensenhament immersiu de las lengas territorialas, e l’article 9, qu’autorizava que de prenoms aguèsson de signes grafics qu'existisson pas en francés, coma la “ñ” del breton e los accents pròpris de l’occitan.

Lo collectiu ramenta que l’article 2 de la Constitucion foguèt adoptat per luchar contra l’anglicizacion creissenta (Lei Toubon) mas qu’a l’ora d’ara servís pas que per reprimir l’usatge de las lengas dichas regionalas.