Era formacion musicau aranesa Es Paums, creada en 1973, que tornarà ar empont en Vilamòs (Val d’Aran) eth pròplèu 15 d’agost a mièjanet, en tot hestejar eth sòn 40u anniversari, en encastre dera hèsta major deth pòble.
 
Pendent era actuacion se harà un petit aumenatge a José de çò de Joanet, que siguèc baile de Vilamòs en 1973, e eth prumèr en confiar en Es Paums.
 
Es Paums qu’auien tocat per tot er estat espanhòu en tot interpretar musiques de hèsta major. Mès entath retorn, e entà hestejar aguest anniversari, eth grop que prepause un repertòri eterogenèu damb diuersi estils: avanères, cançons tradicionaus araneses, tradicionaus catalanes e quitament ròck.
 
Pendent era actuacion se servirà vin caud en substitucion deth tradicionau rom cremat abitual enes avanères en Catalonha.
 
Eth concèrt qu’amassarà a sies des mès de trenta musicians qu’an hèt part deth grop musicau aranés: Joan de çò de Joandejaime, Tònho de çò de Lucia, Joan Massana de çò de Lucia, Josep Rebull, Eugeni Bobillo e Loís Carrèra.
 
 
 

Jusèp Castet