Elèit 1: Carcassona repren la primièra plaça

Quatre partidas del campionat d’Elèit 1 se jogavan dissabte de vèspre. Doas vegèron las victòrias aisidas dels Dragonets fàcia a Vilanòva (52-2) e de Carcassona fàcia a St Gaudenç (52-16).

Las autras doas foguèron plan mai disputadas. Es en tota fin de partida que Pià puntava l’ensag de la victòria a Tolosa: 26-24. Al Molin, Lesinhan recebiá lo novèl primadièr de la competicion: Albi. A la pausa, los locals menavan 8-6. De retorn sus la pelena, Albi marcava dos ensages per menar 18-8. Lesinhan replica dins las dètz minutas seguentas per tornar passar davant: 20-18. L’alièr Gouzy intercèpta una passa dins sos 20 mètres e travèrsa la pelena per marcar. Lo darrièr ensag tarnés serà tròp tardièr e Lesinhan ganha 26-24. Atal, Carcassona torna prene als albigeses la primièra plaça del classament.

Dimenge, a l’Agulha, Limós fa la diferéncia a la debuta del segond temps per batre Avinhon 28-16.

Aqueste dimenge 18 de febrièr, serà jorn de dèrbi a l’Agulha ont los campions limosencs auràn la vesita dels vesins Canaris de Carcassona.

Superliga: los Lops a Brutus

Per lor primièr rescontre de la sason de 2024 de Superliga, aqueste dissabte 17 de febrièr, a 6 e mièja del vèspre, los catalans reçaupràn los Lops de Warrington.

Mas la primièra partida de la sason veirà aqueste dijòus 15 l’oposicion entre las doas formacions d’Hull. Divendres, los Sants reçaupràn los nòuvenguts de Londres, Leeds reçauprà Salford e Huddersfield se desplaçarà a Leigh; dissabte, lo campion Wigan jogarà a Castleford.

L’Équipe se bota al XIII

La cadena L’Équipe Live (disponibla sus internet) qu’a ja assegurada la retransmission de qualques partidas dels Dragons la sason passada, ven d’oficializar la difusion de las 27 partidas de la sason de Superliga dels Dragons. De mai, los catalans poiràn seguir las retransmissions sus TV3 e Esport3. Un pas de mai cap a la sortida de la marginalizacion?

Dobertura de la sason en NRL

Aqueste divendres 16 de febrièr, la sason NRL se dobrirà a Townsville amb lo tradicional rescontre amical entre la formacion dels Maòris de Nòva Zelanda e la formacion dels Aborigèns d’Austràlia.

 Femeninas: cap a la Copa del Mond de 2026

Per poder participar a la Copa del Mond de 2026, las francesas devon sortir primièras d’un grop ont rescontraràn Grècia a Marmanda, lo 13 d’abril, puèi Serbia a Belgrad lo 22 de junh. S’acaban segondas, auràn una partida qualificativa de jogar contra las segondas de l’autre grop europèu: País de Galas, Irlanda e las venceiras d’Itàlia-Païses Basses (27 d’abril).

Aqueste dimenge 17 de febrièr, 28 jogairas son recampadas a Aigasvivas per preparar aquelas partidas decisivas.