Lo govèrn d’Aragon, dirigit pel Partit Popular (PP) amb lo sosten de Vox e del Partit Aragonés Regionalista (PAR), a idèa de quitar de considerar lo catalan e l’aragonés coma de “lengas pròprias” de la region, çò rapòrta lo Diari de la Llengua. En plaça d’aquò, seràn consideradas coma de simplas “varietats lingüisticas” del territòri, un cambiament d’actitud similar a l’iniciativa del PP en 2013, quand lo catalan e l’aragonés foguèron rebatejats amb los estranhs eufemismes Lapao (Lenga Aragonesa Pròpria de l’Airal Oriental) e Lapapyp (Lenga Aragonesa Pròpria de l’Airal Pirenenc e Prepirenenc) respectivament.

Aquela decision apareis après que lo ministre espanhòl de la cultura, lo catalan Ernest Urtasun, a cridat a protegir las "lengas minoritàrias" coma l’aragonés e l’asturian, qu’an pas d’estatut oficial dins lor territòri. Malgrat l’engatjament del govèrn central de protegir las lengas, l’executiu aragonés a renonciat a la politica lingüistica e a daissat sens finançament l’Acadèmia Aragonesa de las Lengas (AAL), encargada de promòure las lengas pròprias d’Aragon e de n’establir de nòrmas.

Lo governament aragonés justifica sa decision en afirmant que desira de preservar la riquesa lingüistica de la region, e mai las variantas dialectalas talas coma lo cheso e lo gistavin (de l’aragonés) e lo fragatin (del catalan). Pasmens, lo partit de la Chunta Aragonesista (Union Aragonesa) critica aqueles cambiaments, acusant l’executiu regional de desmantelar los simbòls identitaris d’Aragon, dont las lengas.

FIRMA esta petición al Gobierno de Aragón:
"Mantener la protección del aragonés y el catalán de Aragón".
Nos acercamos a los 5.000... ¡Vienga ixe nuevo empentón, mesaches e mesachas!https://t.co/6QmYugH45fpic.twitter.com/gxiG6wbtWv

— Rolde de Estudios Aragoneses (@REA_rolde) February 13, 2024