La Comission Europèa trabalha amb los estats membres sus la creacion d'un plan que permeta de reduire la carga administrativa dels pageses. L'institucion vòl que se debata al Conselh d'Agricultura, previst pel 26 de febrièr.

La presidenta de l'executiu de l’UE, Ursula von der Leyen, anoncièt al començament de febrièr que trabalhariá amb la presidéncia del Conselh de l’Agricultura sus una reduccion de la pression burocratica pel sector agricòla e noiriguièr. “Soi plan sensibla al messatge que los agricultors son inquiets de las cargas administrativas”, çò diguèt dins una conferéncia de premsa après la reünion dels caps d'estat e de govèrn de l'UE lo 1r de febrièr passat.

“Lèu presentarem mai de proposicions per ajudar a solaçar la pression que tòca nòstres agricultors”, çò tornèt dire dimars passat, al moment de la derogacion de l'obligacion pels agricultors de daissar en garach una partida de las tèrras de cultura per fin de recebre una part dels sostens de la politica agrària comuna (PAC).