L’opausant rus Alexei Navalni es defuntat en càrcer, çò anoncièrion ièr divendres las autoritats penitenciàrias russas. Segon lor version, la mòrt li seriá arribada après una passejada pendent la quala Navalni auriá agut un malaise e se seriá estavanit. Dins sos 47 ans, Navalni èra lo principal opausant politic de Vladimir Putin.

En decembre passat, après tres setmanas sens lo poder localizar, la còla juridica de Navalni lo retrobèt dins una preson de la vila de Kharp, dins la region de Iamalia, près de l’ocean Artic e a mai d’un milièr de quilomètres al nòrd-èst de Moscòu. La familha de l’opausant aviá denonciat mantun còp las marridas condicions de son encarceracion.

Navalni comencèt d’èsser conegut coma opausant a Vladimir Putin pels articles de son blòg a la fin dels ans 2000. Son discors èra tanben caracterizat per un fòrt nacionalisme rus. Entre 2011 e 2012 organizèt de protèstas e de manifestacions per denonciar la corrupcion e la frauda electorala de Putin e son entorn. En 2013, se presentèt a las eleccions municipalas coma candidat al mandat de cònsol màger de Moscòu, ont, malgrat las allegacions d’irregularitats, obtenguèt lo 27 % dels vòtes. Puèi, Navalni contunhèt sa campanha contra lo govèrn de Putin e sos excèsses e, entre d’autras causas, revelèt que Putin possedissiá un palais sus la mar Negra, bastit amb de fonzes desvirats.

A comptar d’alavetz, l’opausant rus comencèt de patir de persecucions e repressions judiciàrias. En 2014, foguèt reconegut colpable de desvirament de fonzes, mas foguèt liberat a l’endeman de la publicacion de la senténcia. Puèi, foguèt jutjat per d’autras acusacions. En 2016, Navalni se faguèt candidat a l’eleccion presidenciala de 2018, mas lo conselh electoral li n’empachèt en causa de sos problèmas judiciaris.

Lo 20 d’agost de 2020, Alexei Navalni foguèt espitalizat en Siberia dins lo còma en seguida d’un empoisonament. Tornava en avion de Moscòu, comencèt de se sentir mal e l’avion deguèt far un aterratge d’urgéncia a Omsk. Sospechava que l’intoxicacion li èra venguda dins un tè begut a l’aeropòrt de Tomsk, abans de prene l’avion. Tanlèu que los mètges russes aguèron assegurat que i aviá pas d’indicis d’empoisonament, la familha demandèt que lo transferiguèsson devèrs un espital de Berlin. Aquí los mètges confirmèron son empoisonament amb de Novichok. Un an abans, Navalni èra estat espitalizat per una allergia mentre qu’èra en preson. Alavetz, sa portavotz anoncièt ja la paur de l’empoisonament car Navalni aviá pas jamai agut cap de reaccion allergica.

Après qualques meses de convalescéncia a Berlin, tornèt a Moscòu ont foguèt arrestat e encarcerat. Ara èra condemnat a 19 ans de preson per "extremisme".