A las eleccions al Parlament de Galícia qu’aguèron luòc dimenge passat, los conservators del Partit Popular (PP) d'Alfonso Rueda an capitat a tornar obténer lor majoritat absoluda, malgrat la pèrda de dos deputats. Es la cinquena majoritat absoluda consecutiva del partit, qu'a aital contradich las voses que predisián una eventuala suspresa del blòc d'esquèrra. Dempuèi l'instauracion de l'autonomia en 1981, lo PP a emportat totas las eleccions amb la majoritat absoluda, levat dos còps (1989 e 2005).

La campanha electorala foguèt marcada per de messatges de la política espanhòla dels candidats dels partits majoritaris en Espanha, lo PP e lo Partit Socialista de Galícia (PsdeG, la branca galèga del PSÒE). De fach, la Lei d'Amnestia pels independentistas catalans que, prepausada pel govèrn d’Espanha en negociacion amb sos aliats sobeiranistas, desencadena la colèra dels partits de drecha e extrèma drecha en Espanha, foguèt sistematicament evocat dins los discorses del PP, qu'a tanben acusat dels mals del país lo primièr ministre espanhòl Pedro Sánchez.

Los sondatges e la particularitat del territòri, ont los discorses que son pas pròpris de l’airal politic de Galícia presentan pas cap d'interès per l’electorat, an menat los expèrts a pensar que l'estrategia del PP greujariá la drecha espanhòla e favoririá lo Blòc Nacionalista Galèc (BNG) d'Ana Pontón, un partit que dempuèi las darrièras annadas s’es plaçat coma la vertadièra alternativa. Malgrat qu'aja pas fin finala capitat a far pèrdre la majoritat absoluda al PP, lo BNG s'es assolidat coma la segonda fòrça del parlament galèc amb 25 sètis, siá 6 de mai que fins ara e 19 de mai qu’a las eleccions de 2016. Per contra, lo PSdeG de Xosé Ramón Gómez Besteiro, qu'aviá fins en 2020 totjorn representat la segonda fòrça al Parlament de Galícia, s’enfonza clarament a la tresena plaça amb solament 9 sètis suls 14 qu'emportèt pendent la darrièra legislatura.

A la victòria finala del PP a contribuit la division de l’esquèrra en Galícia, ont lo vòte es estat partejat a aquela escasença entre quatre grands partits, BNG, PSdeG, Sumar (Addicionar) e Podèm, sens que las darrièras doas formacions ajan pogut aténher una representacion parlamentària. Per contra, lo vòte de drecha s’es concentrat sus l'ensemble del PP, puèi que l'extrèma drecha de VOX a pas ​obtengut que lo 0,12% de la fisança dels electors. Malgrat aquò, lo total dels vòtes d'esquèrra a despassat lo del PP pendent aquelas eleccions. La fortalesa de la drecha espanhòla es pas, doncas, inexpugnabla.