Fa ja 26 ans qu’occitans e catalans se retròban lo primièr dimenge d’agost en la tradicionala pojada al Pòrt de Salau, a 2100 mètres de nautada. Los occitans sortisson de Salau (Coseran) e los catalans de la vila catalana d’Esterri d’Àneu. L’amassada es venguda un simbòl d’amistat e de revendicacion nacionala dels dos pòbles vesins.

Ongan, lo bèl temps a favorit la participacion, qu’a comptat mai de 600 personas segon Núria Bayó, presidenta del CAÒC.
 
Lo procès d’independéncia de Catalonha a plan marcat l’acte, amb l’issament d’una bandièra estelada (simbòl de la lucha catalana per l’independéncia) e una evocacion de la cadena umana per l’independéncia que traversarà lo país catalan l’11 de setembre que ven.
 
Demest los collectius participants, cal soslinhar la Fondacion del Patrimòni de l’estat francés, que collectavan d’engatjaments per manténer l’anciana bastissa de conduccion de fusta, popularament nomenada “era Cantina”. Cal dire qu’una de sas parets ten lo panèl en remembre d’Enric Garriga Trullols, mòrt en novembre de 2011, qu’ongan es la segonda annada que l’amassada se debana sens el.
 
Coma totjorn, se faguèt d’actes d’afrairament, d’escambis de produches dels dos terraires, de danças tradicionalas, de discorses de benvenguda, e fin finala s’issèt las bandièras de las doas nacions del temps que lo mond cantavan Se Canta e Els Segadors.
 
L’emplaçament d’aquel pòrt es simbolic: s’agís d’un camin natural entre Occitània e Catalonha qu’a servit istoricament per connectar los dos pòbles.
 
Per arribar al pòrt, als occitans lor cal caminar tres oras del temps que los catalans sonque marchan 45 minutas. Es per aquò que tradicionalament los occitans pòrtan lo formatge e los catalans i menan lo vin.