Lo Bundestag ven de votar una lei que legaliza la possession e lo consum de cannabis en Alemanha, çò rapòrta Vilaweb. La novèla lei marca un cambiament significatiu dins la politica sus las drògas del país, mas fixa de limits estrictes, autorizant fins a cinquanta gramas de cannabis pel consum privat e vint e cinc dins los espacis publics. Aquela decision plaça Alemanha en Euròpa amb Malta e Luxemborg, que legalizèron lo cannabis recreatiu respectivament en 2021 e en 2023.

Pasmens, l'opinion publica en Alemanha sembla devesida. Segon La Dépêche du Midi, un sondatge YouGov indica que lo 47% de las personas interrogadas sostenián la legalizacion, mentre que lo 42% d’elas s'i opausavan.

La lei autoriza egalament la cultura privada, la cultura comunautària non comerciala e la distribucion contrarotlada de cannabis per d'associacions cannabicas. Lo govèrn alemand afirma qu'aquela legalizacion a per mira de reduire lo mercat negre e de melhorar la proteccion de la santat publica, malgrat qu'aquela posicion siá contestada per l'oposicion conservatritz, los sindicats de policièrs e mai qualques membres del Partit Socialdemocrata d’Alemanha (SPD).

Lo consum de cannabis rèsta ça que la enebit a proximitat de menors, d'escòlas, de grépias e d'installacions esportivas. La cultura e la distribucion seràn possiblas del 1r de julhet enlà pel biais d'associacions apeladas "clubs cannabics", que seràn autorizadas a vendre un maximum de 25 gramas per jorn e pas mai de 50 gramas per mes a lors membres, limitats a 500 personas. Los membres devon èsser adultes, e las personas annadidas de 18 a 21 ans pòdon pas obténer que 30 gramas mesadièrs amb un limit d’un 10% de THC.