La version finala del Plan Lop 2024-2029 de l’estat francés, revelada lo 23 de febrièr, suscita de preocupacions demest los defensors dels lops, çò rapòrta Reporterre. Lo plan compren un protocòl simplificat pels tirs dels noiriguièrs e lobatièrs sus aquela espécia, aital coma un metòde novèl de calcul que poiriá subrestimar la populacion dels lops. Aquela estimacion determina la quòta annadièra de bèstias que pòdon èsser abatudas, fixada al 19 % de la populacion. Mentre que certans noiriguièrs, representats per Claude Font, de la Federacion Nacionala Ovina (FNO), se mòstran satisfaches, l’etnològ Pierre Jouventin critica la politica d’abatatge prepausada, en afirmant qu’aquò perturba las ardadas e conduch a d’atacas sul bestiar.

En mai d’aquò, Cédric Martel, de la Liga per la Proteccion dels Aucèls (LPO), exprimís son malcontentament envèrs la manca de consideracion de las consequéncias ecologicas, apelant a un vertadièr debat public basat sus la sciéncia.

D’autre costat, al nivèl internacional, Brussèlas es a considerar lo desclassament dels lops de l’annèxe II (estrictament protegit) a l’annèxe III (protegit) de la Convencion de Bèrna, ajustant una dimension de pression internacionala sus la question. Ursula von der Leyen, la presidenta de la Comission Europèa, prepausèt d’efièch lo 20 de decembre un tèxt que suggerís un assopliment de l’estatut de proteccion del lop.