Aqueste dimenge 3 de març, las Aglas de mar (Manly) e los Lapinons (Sydney Sud) joguèron la primièra partida de la sason NRL a 12 000 km de l’ostal. La confrontacion se tenguèt a Las Vegas dins l’estadi ont se ven de disputar la finala de l’NFL, lo Super Bowl. Un terren mai pichon que de costuma, un estadi cobèrt, una palma marcada de las estelas de la bandièra estatsunidenca, 41 000 espectators remosats. La campanha d’anóncia aviá explicat als estatsunidencs que semblava a lor fotbòl mas sens casco, sens proteccion, sens remborratge, sens passas endavant e sens arrèst de jòc!

Manly menava a la pausa (12-10), los Lapinons marcavan dos còps a la represa per prene l’avantatge (20-12), mas las Aglas de Mar alinhavan 4 ensages per prene una avança decisiva e véncer 36-24.

La segonda partida foguèt mens prolifica en ensages: los Polets menèron de longa per ganhar 8-4 a la pausa e 20-10 fàcia als Cavals Fòls de Brisbane.

Aquela capitada populara demòra de concretizar dins la durada amb una vertadièra organizacion del XIII als Estats Units, ont l’NRL vòl téner un ròtle de primièra.

Dijòus, entamenada de la competicion en Austràlia amb Newcastle-Canberra. Divendres, se jogaràn Melbourne-Penrith e, a Auckland, Combatents-Cronulla; puèi, dissabte, Parramatta-Canterbury e Gold Coast-Sant Jòrdi/Illawara. Dimenge, dèrbi en Queensland entre Dalfins e Vaquièrs.

Primièra desfaita dels Dragons

Dissabte, los Dragons coneguèron lor primièra desfaita de la sason en desplaçament a Leeds (18-10). Se tornaràn mobilizar amb dos rescontres a domicili fàcia a Hull FC (dissabte 9) e Castleford (dissabte 16).

Divendres sens suspresa amb las victòrias de Saint Helens fàcia a Leigh 12-4, de Warrington fàcia a Castleford 30-8, e de Wigan fàcia a Huddersfield 30-16. Dissabte, Salford batiá Hull KR: 17-10. Dimenge, primièra victòria de la sason per Hull FC que recebiá Londres: 28-24.

Sens suspresa, amb sas 3 victòrias, Saint Helens es en cap de classament alara que Castleford e Londres son en cèrca d’una primièra victòria.

Carcassona e Albi an fait lo trauc

Carcassona bat aisidament Tolosa 58-6; Albi fa la diferéncia dins lo segond temps contra Vilanòva per ganhar 14-4. Carcassona es ja assegurat de la qualificacion dirècta per las mièjas finalas e Albi gaireben.

Lesinhan, venceire de St Gaudenç 48-16, e Limós, batut sus sa pelena per Pià (18-10), demòran jos la menaça dels dos clubs catalans per jogar lo barratge a domicili, e mai se los Dragonets pèrdon al punt en aur a Avinhon (25-24).

Aquesta dimenjada, plaça a la Copa amb los quarts que se jogaràn dissabte: Carcassona-St Gaudenç, Lesinhan-Albi (e los tarneses se sovendràn de lor desfaita fa gaire sus la pelena del Molin) e Avinhon-Vilanòva (una victòria tornarà balhar de vam al venceire) e dimenge: un indecís Dragonets-Limós.

Las mièjas finalas se debanaràn a la debuta d’abril a Marselha.