Mart es font de mites e d’inspiracion dempuèi l’Antiquitat. Es tanben un luòc de recèrca interessant per trobar una forma de vida extraterrèstra. Se, dempuèi los ans 1960, Mart es una destinacion populara per las missions espacialas, ara, pel primièr còp, la NASA convida lo sector privat a sometre de proposicions per de missions comercialas sus la Planeta Roja, çò rapòrta The Conversation. Aquelas missions van del transpòrt de divèrsas cargas utilas cap a  planeta a la fornidura de servicis de retransmeteires de comunicacion, sens mençon de transportar de personas sus Mart.

L’exploracion modèrna de Mart a conegut 50 missions dempuèi 1960, amb 31 consideradas coma capitadas malgrat de malescadudas notablas coma l’escrachament del modul Schiaparelli en 2016. Aquelas missions an fornit d’informacions ricas sus Mart, suscitant l’interès public malgrat d’explicas geologicas mai a ras de sòl. Las missions interplanetàrias còstan almens un miliard de dolars, e las principalas agéncias espacialas an investit almens 50 miliards de dolars sus Mart, principalament per i enviar de camèras, de rovèrs e de moduls d’aterratges. De mandar d’umans sus Mart seriá una entrepresa de tot autre nivèl.

La NASA explòra de novèls apròchis per las missions espacialas en se virant cap al sector comercial. D’entrepresas talas coma SpaceX, dirigida per Elon Musk, an radicalament cambiat l’apròchi tradicional de la NASA en adoptant d’iteracions rapidas e en aprenent lèu de las malescadudas. D’autres actors comercials als Estats Units contribuisson tanben a aquela evolucion. L’estrategia actuala de la NASA consistís a tornar sus la Luna amb lo programa Artèmis, puèi a establir una preséncia umana sus Mart, en favorissent l’externalizacion dels desvolopaments.

Aquel apròchi sembla mai viable uèi, amb d’avantatges potencials en tèrmes de còstes e d’eficacitat, mas encara deu far sas pròvas. Lo principal impacte positiu poiriá èsser l’estimulacion portada pel sector comercial, amb d’innovacions que respondan als besonhs de las missions espacialas e qu’ajan, mai que mai, una repercussion economica e sociala potencialament mai importanta que l’exploracion de Mart ela meteissa.

La question de saber se los umans deurián anar sus Mart suscita un debat. D’unes soslinhan la necessitat de preservar la Tèrra abans de colonizar d’autras planetas, mentre que d’autras cridan a una exploracion espaciala mai orientada cap a la durabilitat. Malgrat aquelas discussions, l’istòria de l’exploracion umana mòstra qu’una fraccion pichona de la populacion motivada e provesida de mejans financièrs pòt concretizar de tals projèctes. L’avenidor dirà se Mart serà diferenta d’aquela tendéncia.