Actualitats
Fòrça Obrèra que carga contra l’ensenhament de l’occitan e deu basco
La delegacion deus Pirenèus Atlantics deu sindicat qu’ensaja d’alertar deus “chepics” qui va portar la generalizacion de l’ensenhament dit bilingüe
Lo sindicat Fòrça Obrèra (FO) que carga contra l’ensenhament public de las lengas autoctònas autas que lo francés. Dens ua letra adreçada a tots los ensenhaires deu departament deus Pirenèus Atlantics (Bascoat Nòrd, Bearn e Baish Ador), lo sindicat que demanda d’arrestar lo vam que pren l’educacion dita bilingua, qu’avertís que poderé generar “caos”, qu’accentuaré “la segregacion sociau”, e quitament que parla de riscs taus ensenhaires en francés.
Dens lo païsatge educatiu actuau, lo debat sus l’ensenhament en lenga dita regionau que pren ua amplor navèra. Lo Director Academic deus Servicis de l’Educacion Nacionau (DASEN) qu’indica ua possibla accentuacion de la tendéncia, dab un projècte qui a per mira de generalizar lo bilingüisme dens totas las escòlas deu sector basco, includint l’immersion dens totas las escòlas mairaus.
Segon lo DASEN, aquera orientacion que representa un progrès cap a ua societat mei inclusiva e diversificada. Lo projècte actuau defenut per l’ofici public au près deu ministèri qu’a per mira d’alargar l’accès a l’ensenhament bilingüe, en auherint atau d’oportunitats educativas equitablas a tots.
Totun, dens ua letra adreçada a tots los ensenhaires de las escòlas publicas deu departament deus Pirenèus Atlantics, lo sindicat Fòrça Obrèra (FO) qu’a alertat qu’aqueth projècte e poiré crear lo “caos” entà l’educacion, e demanda d’arrestar ua futura generalizacion de l’ensenhament bilingüe.
FO qu’acusa lo projècte de mesconéisher las realitats deu terren, en obrint pertot e en metent en concurréncia las escòlas bilinguas. Qu’averteish que la qualitat de l’ensenhament dens lo cursus bilingüe ei metuda en perilh si los pòls existents benefícian pas de mejans adeqüats, e qu’ua generalizacion deu bilingüisme accentuaré la “segregacion sociau” deus escolans.
Fin finau, la letra que parla deus riscs taus ensenhaires en francés, qui poirén estar confrontats “a desfís màgers”, dab la concurréncia enter las lengas en afectant las lors pòsts. Los riscs de mobilitat geografica, de demissions e la manca de pòsts disponiblas que son tanben “chepics” evocats per FO.
La reaccion de FO que met en evidéncia l’existéncia d’un debat qui mancarà pas de s’intensificar a mesura que l’ensenhament bilingüe se generalizarà. L’opcion de FO qu’ei de pausar “l’intrusion” deu basco o de l’occitan com un problèma dens un sistèma educatiu ja plan degradat. Tot que depend tostemps deu punt de vista dab lo quau se considèran los problèmas e, evidentament, deus prejutjats educatius o politicolingüistics.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Tot aquò fa cagar!
Al·lucino, es veritat!? com pot ésser tanta...bé no se que volen i que pretenen, però la raó i l'enteniment brilla per l'absència, diria que és delirant, encara hi ha gent que pensa així!?
Com diem...d'on no n'hi ha no en pot rajar!
A Occitània, és parla amb Occità, clar oi!?
Visca la Terra...Lliure!
L'Ernest, "El Tàrrega".
En Lachaud: Cau estre antieuropèu?
Cau brembar FO qu'ei hòrt minoritària hens las instàncias academicas deus Pirenèus Atlantics (FSU 5 elejuts, Unsa 4, FO 1). La pausicion de FO qu'ei coneguda per tots hens la profession e los lors maishants resultats a las eleccions professionaus qu'ei la pròva que la màger part deus ensenhaires ne'us segueishen pas.
FO es contra l'occitan o lo basc ? Es lo contrari qu'aguèsse estat espantant. Que dins aquel païs qu'es sonat abusivament "França" , mas qu'es en realitat la republica francimanda de Paris, TOT l'aparelh politic, de l'esquèrra a la drècha, es nacional-parisianista. Idem que las institucions, los partits franceses, quines que siaguen, vèsan coma una evidència tras que naturala lo centralisme parisenc de drech divenc e l'exclusivitat universala del francimand, considerat coma la SOLA lenga que valga al mond (que l'englès es un usurpator illegitim, alara las lengas minorizadas, m'as comprès !)
Aquelas "evidencias" prigondament estampadas dins las ments francèsas e qu'òm lor fai engolir tre l'escòla pichona amb la faula del "roman" nacional inventada al sègle 19 per legitimar l'iper-centralisme parisenc, son coma una segonda natura.
Al final, emai la republica francimanda de Paris a fenit per creire, tras sos elèits (!),a-n-aquesta faula que s'es inventada èla-quita ! Aquel afar de F.O. es pas qu'un banal auvari novèl d'aquesta egemonia mentala parisenco-francimanda que, gràcia a l'Educacion "nacionala" e als mediàs parisencs e aparisenquits, senhorèja en França, foguesse a cò dels "revolucionaris" (!!!)
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari