Lo 9 de març, dins los quartiers Trivala e Barbacana de Carcassona se tenguèt lo Carnaval 2024.

Un brave trabalh d’organizacion fuguèt fach en amont per las tres escòlas Calandreta: doas a Carcassona: calandreta Miquèl Decòr, calandreta Barbacana e calandreta La Rosèla de Viladubèrt.

Los ensenhaires, los escolans e de parents tanben obrèron amb la tropa Teatre de las originas per montar de scenetas que fuguèron jogadas per carrièras o sus d’emponts tot long del percors. Una chorma importanta amb de gens desguisats seguiguèt lo passacarrièra animat per la fanfara Tonton A Faim.

Lo rei de Carnaval e los enfants demandèron las claus al Capitol per faire fèsta. Lo grop de parents se vestiguèron en Salvatges fòrça impressionants, cargats de portar lo mal. Los pichonets de mairala fuguèron bofatièrs totes vestits de blanc e dançèron lo Bufòli totes en rengueta amb lor bofet! Los grands joguèron amb una granda Quaresma montada sus d’escaças e se trobèron davant la glèisa Sant Gimer per criticar Carnaval e l’arrestar.

Pròche lo pont vièlh se tenguèt a la fin lo jutjament en occitan de Carnaval per los grands del primari e aquí los Salvatges se’n prenguèron a Quaresma, la mascarèron de tèrra grassa mas fin finala Quaresma ganhèt, de segur, coma o vòl la tradicion, e botèt lo fuòc al rei Carnaval.

Quin plaser d’entendre l’occitan en Carrièra Trivala, aquela preséncia dins la vida vidanta èra espectaclosa!

Podèm soslinhar lo trabalh fach per los regents, los enfants e lo Teatre de las Originas qu’ofriguèt la velha dos espectacles al teatre Le chapeau rouge, Le roi Carnaval et la vieille Carême, per los enfants de matin, e per los adultes l’après-dinnar Carnaval, bolèga, un espectacle interactiu plan presat!

La fèsta fuguèt seguida d’un aperitiu amb los vinhairons de Made in Douzens.

Tot aquel après-dinnar permetèt de metre endavant las lenga e cultura occitanas. Podèm pas que dire “òsca!” a totes aqueles qu’an fach de Carnaval Trivala una granda capitada!

TèVéÒc filmèt lo tot e vos donarà lèu lo ligam per descubrir aquel Carnaval bèl!

Lo Carnaval se faguèt amb l'ajuda de l'IEO11 e d’autres: Teatre de las Originas, Associacion dels Comerçants de la Carrièra Trivala, lo Trivalenc, Made in Douzens, Carcassona Patrimòni Mondial.

TèVéÒc
Lisa Gròs de l'IEO11

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…