Avançada màger sus l’autonomia de Corsega. Lo govèrn francés e los elegits còrses se son meses d’acòrdi sus un projècte d’escritura constitucionala. Diluns de ser, lo govèrn francés e los elegits còrses de la collectivat insulara pachèron de reformar la lei fondamentala francesa per “la reconeissença d’un estatut d’autonomia” de l’illa, “dins la Republica”, çò anoncièt lo ministre de l’Interior francés, Gérald Darmanin. Lo projècte serà ara enviat a l’Assemblada de Corsega per aprobacion.

Après lo vòte de l’assemblada còrsa, lo president de la Republica francesa entreprendrà la reforma constitucionala, çò detalhava Darmanin en tot remembrar que lo tèxt deuriá èsser votat per las doas cambras del parlament dins los meteisses tèrmes, e puèi adoptat pel Congrès (la reünion de las doas cambras) per de cinc parts tres. Aquò serà probablament complicat, vista l’oposicion anonciada de la drecha conservatritz majoritària al Senat: lo president del grop senatorial, Bruno Retailleau, considèra sus X que “lo projècte sus Corsega val ben a constitucionalizar lo comunautarisme” e a “reconéisser la nocion de pòble còrs”.

Lo primièr paragraf del tèxt de l’acòrdi ditz: “La reforma constitucionala prevei la reconeissença d’un estatut d’autonomia per Corsega dins la Republica, que prenga en compte los interèsses pròpris ligats a son insularitat mediterranèa e sa comunautat istorica, lingüistica e culturala, qu’a desvolopat un ligam singular amb sa tèrra.”

En mai d’aquò, se deurà aprovar una lei organica, que completarà lo tèxt constitucional, per determinar dins quines domenis Corsega poirà establir sas nòrmas, reglementàrias o legislativas.

Lo president del conselh executiu de Corsega, l’autonomista Gilles Simeoni, assolida que s’es fach un pas decisiu. “Lo principi d’un poder còrs de natura legislativa, somés a un contraròtle del Conselh Constitucional, es uèi clarament acceptat”, çò precisèt.

De son latz, lo govèrn francés a volgut assegurar que i aviá pas “la separacion de Corsega amb la Republica” en tot afirmar que lo tèxt prevei pas en cap de cas que i aja en Corsega doas categorias de ciutadans. “I a pas cap de nocion de pòble [còrs] mas de comunautat culturala”, çò diguèt Darmanin en tot soslinhar que lo tèxt “evòca pas lo pòble, ni l’estatut de resident, ni la cooficialitat de la lenga”.

Ce soir, avec les représentants politiques corses, nous avons trouvé un large accord institutionnel conforme aux exigences fixées par @EmmanuelMacron. Cet accord sera prochainement débattu par l’Assemblée de Corse avant de prendre le chemin des consultations politiques… pic.twitter.com/6GaUrqD29A

— Gérald DARMANIN (@GDarmanin) March 12, 2024