Es una bona nòva dins lo mitan scientific que trabalha sus la matèria occitana e las lengas romanicas en general. Las edicions Classiques Garnier (París) venon de crear una novèla revista scientifica, la Revue d’études médiévales et de philologie romane. Lo títol es en francés mas la revista aculhís d’articles redigits en tota lenga romanica, occitan inclús, en alemand o en anglés. Coma o indica son títol, es centrada sus dos pilars fondamentals dels estudis occitans, los dos que benefícian de la tradicion mai anciana: los estudis medievals, d’un costat, amb las creacions trobadorescas mas pas sonque, pels especialistas de literatura e tanben pels istorians medievistas, e, d’autre costat, la filologia romanica, amb d’edicions de tèxtes, de ponches de lenga examinats segon una amira istorica.

“S’agís de respondre a una demanda internacionala, çò comenta Marjolaine Raguin, mèstra de conferéncias a l’Universitat Tolosa-Joan Jaurés e cofondadora de la revista amb lo cercaire italian Fabio Barberini, que benefícia del patronatge de qualques grands noms dels estudis romanics e occitans, coma Walter Meliga, Jean-Pierre Chambon, Linda Paterson, Dorothea Kullmann…”. Lo païsatge de las revistas scientificas qu’aculhisson d’articles sus la matèria occitana es larg amb de revistas alemandas (Zeitschrift für romanische Philologie, per exemple), italianas (Cultura Neolatina, Medioevo romanzo) o francesas (Revue des langues romanes, Romania, Annales du Midi…). “Cal pas brica interpretar l’espelida d’aquela revista coma una concurréncia fàcia a de revistas reconegudas de longa”, çò precisa M. Raguin qu’apond tanben: “D’efièch, es puslèu lo signe de la vitalitat e del dinamisme dels estudis romanics e occitans que demòran a l’ora d’ara un camp de recèrca ont fòrça projèctes espelisson mentre que d’investigacions de tota mena contunhan d’èsser menadas per de cercaires del mond entièr”.

Lo numèro 1 ven tot just de paréisser amb tres articles d’un total de sièis sus la matèria occitana e, segon una costuma pro espandida dins lo mitan academic, la revista pareisserà dos còps per an.

RAGUIN, Marjolaine; BARBERINI, Fabio (redactors en cap). Revue d’études médiévales et de philologie romane. Classiques Garnier. 2 numèros per an. 62 èuros.