Segon lo calendèr, es enqüèra l’ivèrn; ça que la, a Bordèu, la prima qu’es dejà arribada!

Mei precisament, la setmana passada se debanè lo hestenau Prima Occitana dens la metropòli girondina – e enlà. De dimars a dimenge, estó perpausada au monde girondin, en mei d’un lòc (Universitat Bordèu-Montanha, Musèu d’Aquitània, Cercle occitan de Canejan, cinèma Jean Eustache de Peçac...), ua causida d’eveniments organizats per l’associacion culturau Bolega e la calandreta de la Dauna (Peçac):

• sia entà har conéisher la lenga nosta, devisar de sa situacion e pensar amassa a mejans de la desvolopar: jornada d’estudi, taula redonda d’actors màgers deu mitan audiovisuau occitan, projeccion/encontre deu documentari Bernat Manciet: un díder de huec...

• sia entà perpausar au monde occitanofòn/-fil de Gironda lésers deu sègle XXIu en lenga nosta: projeccion/encontre de La Seria, karaoké occitan, espectacle comic e musicau bilingüe peus dròlles e ancians dròlles...

• sia entà assegurar la sauvagarda e la transmission de l’istòria occitana de Bordèu: visita deu Bordèu medievau occitan per l’associacion estudianta Bord’Òc entaus escolans de la calandreta e los ensenhaires en formacion lingüistica intensiva (ENSENHAR) a Bordèu...

• sia entà partatjar la cultura nosta, balhar l’escadença au monde occitan (o non) de s’arretrobar a l’entorn de moments de convivéncia e de har víver aquesta cultura ancestrau e viva: iniciacion a la dansa tradicionau e serada bal trad, gran brunch de la calandreta, cantèra, iniciacion a las chancas...

Un hestenau deus hestius e diversificats qu’estó tanben l’escadença per Bolega e la calandreta de la Dauna de celebrar los finançaments que vienón tant per tant d’obtiéner dens la campanha de budget participatiu deu departament de la Gironda: 20 000 èuros entà melhorar los locaus de la calandreta, e 19 000 èuros entà crompar instruments de musica tradicionaus per Bolega.

Tornèsse lèu la prima, lo monde occitan de Peçac qu’an ja idèas per l’an que vien — se podó per exemple enténer parlar de tradusir cançons de Shakira, e après l’escaduda de la juxtaposicion musicau reggae / cant tradicionau (Anam manjar de Mauresca Fracàs Dub e Joan Petit entà en·hestir la companhia au karaoké), qu’espèran vòstas suggestions de cançons de partatjar!