Las chifras son alarmantas e escandalizan. SegonLe Monde, las donadas del Ministèri de la Santat de la lista de Gaza, contrarotlada per l’Hamas, mai de 12300 mainatges an perduda la vida entre octòbre e la fin de febrièr. Aquò vòl dire qu’en solament quatre meses, mai d’enfants son mòrts en Gaza qu’en quatre ans de conflictes al nivèl mondial, segon l'ÒNU.

Lo director de l'agéncia de l'ÒNU pels refugiats palestinians (UNRWA), Philippe Lazzarini, a exprimida son orror davant aquelas chifras, afirmant qu’"aquela guèrra es una guèrra contra los mainatges". Sos mots ressonan coma un bram d'alèrta, en soslinhant qu’aquel conflicte devasta l'enfança e l’avenir dels estatjants de Gaza.

Après cinc meses de conflicte sens cap de signe de trèva entre Israèl e l’Hamas, la populacion de Gaza, ja pro tocada pels bombardaments, es ara confrontada a la famina. La situacion umanitària es critica e los besonhs fondamentals de la populacion son pas corrèctament preses en carga. Amb las vias terrèstras de provesiment de socors barradas o insufisentas, la comunautat internacionala recèrca desesperadament d'autres mejans per portar l'ajuda vitala a aquel territòri estralhat.

Aquela crisi umanitària met non sonque en dangièr la vida dels mainatges, mas tanben en lum la manca de volontat politica per metre fin a aquela guèrra sens fin. Es ora que la comunautat internacionala agisca d'urgéncia per que s’acabe aquel cicle de violéncia que còsta tantas vidas innocentas.