Lo dissabte 16 de març de 2024, lo meteis jorn que la commemoracion de Montsegur, lo Collectiu Occitan tenguèt un acamp qu’i assistiguèt una brava representacion d’associacions e collectius engatjats per las lenga e cultura occitanas. Après analisar la situacion actuala de l'ensenhament, dels mèdias e de la vida publica, s'arribèt a la conclusion que caliá reünir los esfòrces e organizar tornarmai una mobilizacion per la lenga.

Lo Collectiu Occitan amassa un desenat de movements occitanistas dont Convergéncia Occitana, l’IEO, la Confederacion Calandreta, lo Partit Occitan, EELV Occitània, País Nòstre, lo Partit de la Nacion Occitana, Bolegadís, Bastir Occitània, lo Felibritge e Macarèl.

Las manifestacions per l’occitan, organizadas dempuèi 2005 pel collectiu “Anem, òc!” an aguda una importància istorica e an mes en evidéncia que d’occitanistas de drecha e d’esquèrra, d’ecologistas e de partisans de l’energia nucleara, d’atèus e de catolics, de rics e de paures, de pacifistas e de militaristas, de personas simpaticas e antipaticas... avèm agut mostrat totes que sèm capables d’agir amassa e ensems per çò mai considerable: salvar la lenga e la cultura del país, e far avançar Occitània per que recobre sa lenga, sa cultura e l’enveja de marchar a son aise... doncas, de “viure al país”. La darrièra manifestacion per l’occitan se tenguèt a Monpelhièr en octòbre de 2015.