Actualitats
Er estat espanhòu finançarà per lei er Institut d’Estudis Aranesi-Acadèmia Aranesa dera Lengua Occitana
S’aprovèc dimars en Congrès des Deputats espanhòu ua proposicion entara assignacion de hons estataus ar IEA-AALO
Tèxte legit
Er estat espanhòu finançarà er Institut d’Estudis Aranesi-Acadèmia Aranesa dera Lengua Occitana (IEA-AALO). Dimars passat se presentèc e s’aprovèc ena Comission de Sciéncia, Innovacion e Universitats deth Congrès des Deputats espanhòu, d’establir per lei era assignacion de hons estructuraus der estat ara Acadèmia Aranesa dera Lengua Occitana.
Era proposicion, la depausèc eth grop parlamentari d’Esquèrra Republicana de Catalonha (ÈRC), e obtenguèc eth supòrt des vòtes en favor de toti es partits (21 vòtes) dehòra deth Partit Socialista (PSÒE) que s’abstenguec (12 vòtes) e de Vox que votèc contra (3 vòtes).
Era abstencion deth PSÒE la defenec eth deputat aranés Amador Marqués, que, a despiet d’auer assegurat e demostrat que podie intervier ena sua lengua mairau ena cramba parlamentària, preferic de hè’c en espanhòu.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
En Francesc Bardòu, vos feliciti per l'iniciativa de reintegracion de la lenga d'òc, de l'Academia Occitana.
Lo catalan modèrn, de l'Institut d'Estudis Catalans, en lo fondamentar En Pompeu Fabra sul dialècte de Barcelona (lo segond dialècte catalan mai espanholizat, après lo valencian de la vila de Valéncia), pas sonque desseparèt lo catalan de la rèsta de l'occitan, mas que dobriguèt la pòrta tanben a la desseparacion del catalan valencian e del catalan malhorquin de la rèsta del catalan, s'òm aplica a aqueles dos dialèctes lo meteish critèri qu'En fabra apliquèt al barcelonés.
De mai, En Fabra daissèt tanben la pòrta mièja dobèrta a la espanholizacion del catalan (que En Fabra esmendèt sonque a mièjas).
Davant l'assimilacion inarrestabla del catalan dins l'espanhòl, la mieuna utopia seria la reintagracion del catalan dins una lenga d'òc reunificada e regenuïnizada, depurada d'espanholadas e de francesadas.
En Jòrdi Caldentey, los Occitans, trebalham a la "granda lenga panoccitana". Del temps que lo Congrès Permanent cultiva lo jardin de cadun dins son parlar local, a l'Academia Occitana de Tolosa, trebalham a l'establiment de l'Occitan Estandard. E l'Academia Aranesa dera Lenga Occitana compta dins sa "seccion estandard" mai d'un membre de l'Academia Occitana, per assajar d'assegurar, tot bèl just, aquesta "reunificacion", incarnada per aqueste estandard — estandard que non lèva res als parlars locals que ne pòdon tant coma o vòlon, tirar profièit. Es de la consciéncia de la necessitat d'una "reunificacion dins una granda lenga panoccitana" qu'es nascuda aquesta Academia Occitana. Ailàs, las gents an páur d'aquela "reunificacion" que confondon amb una "dissolucion" ; la resultat n'es que, globalament, ne nos trobam adara dissolgut dins la granda poison uniformista francesa que non sofrís cap de particularisme de ges de biais, dins pel francés el-meteis, ni per res mai.
Los occitans, del Lòira al Segura, dels Alps a l'Atlantic, avèm lo deure de reintegrar nos, de reunificar nos dins una granda lenga panoccitana modèrna.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari