En dos jorns, mai de 40 000 personas an participat del festenal organizat contra la construccion d’un grand aeropòrt a Kernitron-al-Lann (Bretanha), que se debanèt aquesta dimenjada passada sus l’endrech ont se vòl far aqueste macroprojècte. Los occitans del grop Lo Còr de la Plana sonèron amb de grops bretons plan coneguts coma Sanseverino, Parabellum o los Ramoneurs de Menhirs.
 
Segon lo jornal breton 7Seizh, non sonque los organizaires son satisfaches, mas tanben los espectators-militants. Aperaquí 800 benevòls capitèron de menar a tèrme la reüssida de la dimenjada amb professionalisme e de bons resultats als forums, als debats e a la programacion musicala.
 
Julien Durand, reponsable de l’ACIPA, l’associacion ciutadana concernida pel projècte d’aquel aeropòrt, mostrèt sa satisfaccion a 7Seizh. “Al còr de l’estiu, la mobilizacion feblís pas, tot lo contrari. Refortís nòstra conviccion qu’avèm los mejans d’aténher la victòria contra aqueste projècte inutil que nos serà pas impausat”, çò diguèt.
 
 
Quaranta ans de lucha
 
Fa quaranta ans que se planifica la construccion d’un aeropòrt enòrme al costat de Nantas, a Kernitron-al-Lann. S’agís d’un projècte pensat en de burèus alonhats del terraire e qu’a trebolat tot un país, son biais de viure, sas relacions e que cèrca de desfigurar lo parçan.
 
A la fin dels ans 1970, una plataforma d’associacions s’èra organizada contra aquel aeropòrt e capitèt d’arrestar lo projècte amb de campanhas longas e massissas.
 
Dins las darrièras annadas, lo projècte es tornat sortir del tirador e menaça de destruir 2000 ectars de tèrras agricòlas, de bòsques e d’abitacions.
 
Dins una epòca de crisi economica, mas tanben de crisi d’energia e d’ecologia, l’utilitat d’aqueste projècte es mesa en question, en prenent en compte, sustot, que l’aeropòrt actual de Nantas fonciona pas amb tota sa capacitat e que dins la region i a ja 14 aeropòrts.
 
Dins lo movement antiaeropòrt se ditz qu’aqueste projècte es lo sòmi megaloman del socialista Jean-Marc Ayrault, primièr ministre de França, que foguèt cònsol de Nantas.