Franck Elong Abé, qu’assassinèt Yvan Colonna dins la preson d’Arle en 2022, revèla ara dins un corrièr adreiçat a la jutgessa antiterrorista qu’aquel acte seriá estat comanditat pels “servicis de l’Estat”, çò rapòrta France Bleu. Sas declaracions remeton en question sa version iniciala, segon la quala auriá agit a causa d’una “blasfèmia”. Aquelas allegacions, qu’emanan de quatre paginas redigidas per Abé dins sa cellula e mandadas a la magistrata, acusan la DGSI (Direccion Generala de la Seguretat Interiora) e los servicis de l’estat francés d’aver orquestrat lo murtre, en prometent a Abé una soma de 100 000 èuros per an en preson e una pena reducha a 10 ans en escambi de son acte.

Abé afirma egalament èsser estat en possession d’un telefòn securizat que seriá estat utilizat per escotar los prepauses de Colonna, mas dont l’existéncia apareis pas dins lo dorsièr. Los avocats de la familha Colonna reagisson amb prudéncia, en soslinhant l’importància de verificar aquelas novèlas  informacions. Lo Ministèri de l’Interior nèga categoricament aquelas allegacions, mentre qu’una font pròcha del dorsièr met en dobte la credibilitat de las declaracions d’Abé, en remarcant d’incoeréncias e de trebols psiquiatrics.

D’autre caire, una comission d’enquista parlamentària aviá destapat de disfoncionaments dins l’administracion penitenciària, mas cap de pròva d’un complòt dels servicis de l’Estat èra pas estada establida.

Aquelas revelacions subrevenon dos ans après la mòrt d’Yvan Colonna, qu’aviá aviat de violéncias urbanas en Corsega. Una velhada en memòria d’Yvan Colonna a agut luòc a Carghjese, ont sos pròches e sostens an exprimit lor desir de vertat e de justícia dins aquel afar.