La Cort Superiora de Londres donèt dimars rason a Julian Assange dins lo recors que lo presentèt l’acusat contra son extradicion del Reialme Unit als Estats Units. La resolucion judiciària avalora pas las rasons de l’extradicion mas tot simplament demanda mai de garentidas als Estats Units. La cort a considerat adeqüat d’arrestar temporàriament l’extradicion del jornalista perque vei “de possibilitats realas” que li viòle los dreches umans, e a donat tres setmanas al govèrn estatsunidenc per que presente “de garentidas realas” que se respectarà son drech de libertat d’expression, qu’Assange recebrà un jutjament just e que li infligiràn pas la pena capitala.

En cas de responsa positiva, Assange poirà solament depausar un recors a la Cort Europèa dels Dreches Umans. Se las autoritats estatsunidencas respondon pas, o se lor responsa convenç pas los jutges londinencs, se farà una audiéncia per avalorar lo recors d’apellacion.

Segon WikiLeaks, es possible que los Estats Units convencan los jutges angleses. Amnestia Internacionala avertís, totun, que las garentidas aduchas sián “d’un biais inerent pauc fisablas”.

Las revelacions de WikiLeaks

Los Estats Units reclaman Assange per aver desvelats de centenats de documents confidencials. L’acusan de 18 crimes e delictes d’espionatge e de conspiracion, coma la revelacion de crimes de guèrra comeses en Iraq e Afganistan. Ara per ara, lo ministèri public estatsunidenc demanda una pena de 175 ans de preson.

La primièra publicacion de WikiLeaks remonta a decembre de 2006. Èra un document, signat pel rebèl islamista Hassan Dahir Aweys, que fasiá una crida a engatjar de tuaires pagats per assassinar qualques dirigents del govèrn de Somalia. Tant Assange coma tota la còla de WikiLeaks diguèron alavetz qu’avián de dobtes sus la veracitat del tèxt, e ne balhavan l’analisi als legeires. Mas i aguèt plan d’autras publicacions. En abril del 2010, per exemple, WikiLeaks publiquèt un vidèo que mostrava de soldats estatsunidencs a tuar d’un elicoptèr estant qualques personas, compreses dos trabalhadors de l’agéncia Reuters. Dins los instants d’après lo murtre dels dos òmes, lo vidèo mòstra cossí los soldats tiran contra una forgoneta que se sarra dels còrses per los recuperar.

Una de las revelacions mai fòrtas de WikiLeaks arribèt en estiu de 2015, quand se publiquèt una tièra de documents qu’illustravan que l’intelligéncia dels Estats Units aviá espionats los govèrns francés, alemand, brasilièr e japonés, e qu’aviá tanben susvelhada illegalament l’activitat de societats clau de las economias japonesa e francesa.