Lo pòrt de Baltimore es la mai granda installacion portuària estatsunidenca. Es especializat dins los vaissèls de mèrças e practicament totes los veïculs europèus qu’intran als Estats Units i passan, aital coma la màger part de l’acièr. Gerís tanben de quatre parts una de las exportacions de coire dels Estats Units. Lo pòrt dispausa de mantun terminal especializat en foncion dels produches qu’i son tractats, çò rapòrta Vilaweb que mençona The Washington Post.

La catastròfa a interromput lo trafec maritim dins lo pòrt de Baltimore e a obligat de barrar una de las rotas mai importantas de la vila, qu’es egalament una artèria principala dins lo corredor rotièr entre Washington e Nòva York.

Lo pòrtacontenedors Dali quitèt un dels terminals e foguèt filmat en dirècte mentre que se dirigissiá cap al pont a 1h24 del matin. Pendent quatre minutas, los lums del vaissèl s’escantiguèron e s’aluquèron mantun còp, en indicant d’interrupcions intermitentas dins l’alimentacion electrica de la nau.

Un enregistrament del senhal ràdio de la polícia, a  1h27, captura las convèrsas freneticas dels operators que s’esfòrçan d’evacuar e de reténer la circulacion a l’entorn del pont après ausir un oficièr a anonciar qu’un naviri aviá perdut lo contraròtle de la direccion. “Retenètz tot lo trafec sul pont Key –çò ditz qualqu’un–. Un vaissèl que ven de pèrdre lo contraròtle de la direccion s’apròcha.” D’autres anóncian que se dirigisson cap al pont o qu’an ja començat de reténer lo trafec portuari. Qualqu’un demanda s’i a de trabalhadors sul pont. Mai o mens una minuta après lo messatge que senhala la pèrda de direccion, s’ausís qualqu’un a cridar: “Tot lo pont se ven d’afondrar!”

A 1h28, lo Dali truca lo pont. Mens de 40 segondas mai tard, lo pont s’afondra. La nau auriá pogut passar lo pont sens dificultat, s’aguèsse pas perdut lo contraròtle de la direccion, probablament a causa del defalhiment electric.

Desapareguts, sièis obrièrs que trabalhavan sul pont son presumits mòrts.

Imatges de Vilaweb