La cometa 12P/Pons-Brooks, tanben coneguda jol nom sabent de “Cometa del Diable”, fa actualament son aparicion près de la Tèrra, çò rapòrta France Info. Aquela vesitaira de luènh, que se mòstra pas que cada setanta un ans, es a mand de meravilhar los observaires del cèl. E mai rivalize pas en espectaclós amb de fenomèns coma la cometa d’Hale-Bopp, qu’illuminèt lo cèl en 1997, nos ofrirà un espectacle remarcable. Après aquò, caldrà esperar l’an 2095 per la tornar veire.

Descobèrta per l’occitan Jean-Louis Pons en 1812 a l’observatòri de Marselha, aquela cometa deu son nom a sos dos descobreires successius, Pons e l’estatsunidenc William Brooks, que la tornèt trobar independentament setanta un ans après sa primièra observacion, en 1883. Las primièras mençons d’aquela "Cometa del Diable" remontan quitament al sègle XIV en China e Japon.

Çò que fa venir aquela cometa encara mai remarcabla, es la talha de son nuclèu. Mentre que la mejana dels nuclèus d’aqueles còrses celèstes avesina los 10 km de diamètre, lo de 12P/Pons-Brooks atenh los 30 km, çò es lo triple. Sa coa, malgrat que siá relativament modèsta a respècte d’autras cometas, s’espandís sus mai o mens 50 milions de quilomètres, un tèrç de la distància de la Tèrra al Solelh.

Sas particularitats s’arrèstan pas aquí. Escaissada la “Cometa del Diable” a causa de sos subresauts luminoses, aquela cometa es subjècta a d’explosions que modifican sa luminositat e la forma de son estralh. Cèrts observaires an quitament apercebut doas banas pendent un d’aqueles eveniments, d’ont son escais evocador.

A l’ora d’ara visibla a uèlh nud, la cometa se pòt observar per mejan de pòrtavistas, ofrissent aital una vista subrebèla, sustot pròche la planeta Jupitèr. Per l’observar, es recomandat de se gandir dins d’endreches alonhats de la pollucion luminosa, luènh de las vilas, e de cercar un orizont oèst/nord-oèst desgatjat.

Aquela vesita de la “Cometa del Diable” es doncas una escasença unica pels afogats d’astronomia, abans que desaparesca de nòstra vista per setanta un ans.