Se los orses son mai nombroses que jamai dins los Pirenèus dempuèi lor reïntroduccion en 1996, pasmens lor consanguinitat quita pas de créisser e d’inquietar, çò rapòrta Reporterre. En 2023, d’efièch, se comptèt 83 orses e 16 orsons —segon l’Ofici Francés de la Biodiversitat (OFB)— sus un espaci de 7100 km² que pertòca Occitània, Catalonha e lo Bascoat dels dos caires de lors frontièras politicas, mas de nombrosas associacions coma Païses de l’Ors — Adet, Ferus e França Natura Environament (FNE) denóncian lo risc de consanguinitat creissenta demest la populacion d’aqueles plantigrads. Soslinhan lo besonh urgent d’introduire de novèls individús per preservar la diversitat genetica de l’espècia dins los Pirenèus. “Totes los orsons nascuts en 2023 son concernits, çò escrivon. D’unes son los produches de parents e de pepins eles meteisses ja consanguins. La diversitat genetica se degrada [...] Totes los estudis o afirman, mas l’estat refusa d’agir”. De fach, tota la populacion d’orses proven gaireben exclusivament de 2 femèlas e un mascle.