Lo duo musical occitan Courtial X Kogane, format pel roergàs Paulin Courtial e pel tolosan Dimitri Kogane, ven de sortir son disc Castèls dins la Luna, un album de 9 cançons editat per Sirventés ont la banda presenta sa musica de rock un pauc psiquedelic que mescla d’estils contemporanèus amb un accent nòrd-american que fusiona amb son esséncia occitana. La còla de Ràdio País o definissiá dins Jornalet coma “ua recèpta originau qui reconcília lo tradicionau e la musica mei contemporanèa”.

Lo grop es una de las referéncias occitanas, e sens cap de dobte aduson Occitània al mond per mejan de la musica, en emplegant l’occitan coma lenga; es a dire que pòrtan la cultura dels aujòls a un domeni mai contemporanèu, en li donant quitament lor tòc personal.

De soslinhar la cançon “Negra fin”, una pèça malenconiosa amb una basa repetitiva e immersiva que nos fa ausir de voses fòrça captivantas, que parlan de reddicion e d’abandon de la lucha; s’i prepausa una vision pessimista ont se veirà pas l’alba e s’incita a o daissar tot e tornar començar de nòu. Vertadièrament un messatge misteriós que nos mena a divèrsas interpretacions, pr’amor qu’aquel grop fa totjorn venir unica cada cançon.

En mai d’aquò, l’album conten lo videoclip “24 de febrièr de 2022”, que fa referéncia a l'invasion russa d’Ucraïna. Aicí se pòt apreciar un estil musical ucraïnés dins los cants, qu’amb la guitarra e la batariá produson una pèça fòrça singulara e caotica, en tot imitar las bombas e los crits de la guèrra. De fach, lo clip es fòrça singular, pr’amor qu’i podèm veire cossí se romp absoludament tot al ritme dels planhs e de la batariá. Arriba un ponch que comença d’èsser gaireben psiquedelic e desagradiu, de concèptes que se pòdon associar perfièchament amb la guèrra. Solide, los musicians cèrcan pas d’èsser del gost de totòm pr’amor que fan quicòm d’aspècte pas brica comercial, mas al contrari es un estil unic amb un messatge de denóncia dura, amb la tòca d’exprimir la violéncia per mejan de la musica.

COURTIAL X KOGANE. Castèls dins la Luna. Sirventés, Cultura de primièra necessitat, 2024. 9 cançons e 1 vidèoclip. Version numerica 9 èuros, CD 15 èuros, vinil 20 èuros.