Dins la sala de las fèstas de Quins (Segalar Roergàs), s’orquestrèt fa gaire una conferéncia amb Sèrgi Carles per una lectura de son darrièr libre Istòria d’un sauvatjòt, çò rapòrta La Dépêche du Midi. L’acompanhava Joanina Bodon.

Istòria d’un sauvajòt es lo darrièr obratge de Sèrgi Carles, publicat en 2022 per Letras d’Òc. Es una istòria autentica contada del ponch de vista del mainatge amb una pudor e una retenguda caracteristicas de l’autor el meteis. Una istòria contada en doas lengas: la “lenga de totes”, un còp èra qualificada de “patois”, e lo francés aprés a l’escòla. Lo libre es publicat en un sol volum mas en doas lengas, amb dos títols diferents : Istòria d’un sauvajòt e Je suis cet enfant.

L’òbra revèla los sovenirs de l’enfança de l’autor, en se cabussant dins los ans 1955-1965, al còr del Causse de Calomnièr. Es aquí, sul camin menant ja cap a Cambairac, que l’autor-transcriptor daissa gisclar las reminiscéncias de son enfança a la bòria de “la Vergne”. Un païsatge rude, marcat per de tèrras aridas, entornejat de genebrièrs e de paredons de pèira. Immergit dins aquel mond, lo mainatge del causse s’exprimís pas qu’en occitan, un “dialècte” negligit per las institucions de la IVa Republica. Sèrgi Carles emergís aital d’un temps complit, en explorant lo fin fons de sa memòria per aqueles tròces de vida. Es pas qu’a l’escòla comunala qu’aprendrà lo francés. Brilhant estudiant, jonherà una carrièra dins l’ensenhament en s’esforçant de preservar la plaça de l’occitan.

La conferéncia venenta es programada pel diluns 6 de mai a Cabanès (Segalar Roergàs).

CARLES, Sèrgi. Istòria d’un sauvatjòt. Lètras d’Òc, 2022. 304 paginas. 24 èuros.