La Cort Europèa dels Dreches Umans (CÈDU) prononcièt ièr dimars una senténcia istorica pertocant la lucha contra lo cambiament climatic, pr’amor que condemna Soïssa per aver mancat al drech a la vida privada e familiala de Pia Hollenstein, cofondadora de KlimaSeniorinnen (Senioras pel clima), e de 2400 femnas de mai de 65 ans que provoquèron lo primièr procès climatic devant la cort d’Estrasborg. Denonciavan lor govèrn perque lor protegissiá pas lo drech a la vida en aver pas “introduch la legislacion adeqüata” e “de mesuras sufisentas e apropriadas per aténher las tòcas de lucha contra lo cambiament climatic”. Los avocats de las denonciairas afortissián que “lo govèrn soís fasiá pas son trabalh per combatre lo cambiament climatic, malgrat l’evidéncia scientifica reconeguda pel quite govèrn”, e suggerissián que las autoritats aurián pogut adoptar mai de mesuras dins de domenis coma l’agricultura, l’alimentacion, lo transpòrt e l’abitatge.

“Lo cambiament climatic existís e implica una menaça grèva, actuala e venidoira pels dreches umans”, çò assegura la senténcia. Fins ara la CÈDU solament s’èra prononciada de cases concrets de damatges a l’environament, coma la responsabilitat dels estats per l’escampament de curum o l’exposicion a de materials toxics, mas s’èra pas jamai prononciada sus las responsabilitats dels estats per prene de mesuras per “aténher las tòcas de reduccion dels gases d’efièch de sarra”.