Lo qüatuor musicau Eyes of Simurgh que vien de sortir lo son navèth tribalh Legendas Ruraus, tresau disc deu grop tolosan qu’ofereish la soa proposicion musicau en occitan desempuish dètz ans.

Eyes of Simurg qu’a un estil qui mescla un drin la violéncia e l’agressivitat deu black metal dab las sonoritats foscas e psiquedelicas e las influéncias bluesy deu doom metal e deu stoner rock.

Legendas Ruraus qu’ei sortit aqueste mes d’abriu e amassa composicions de l’estil de contes pòstapocaliptics ancorats dens l’eretatge occitan e dab cançons inspiradas de l’òbra de la poetessa d’Albigés Loïsa Paulin. L’òbra musicau que’s presenta au còp variada e coerenta, dab la mira de transportar lo public per cèrts paisatges desertics, crudèus e ahiscaires inspirats d’ua Occitània possibla dens un futur luenhèc.

Que’s pòt escotar lo disc d’ara enlà sus Bandcamp e lo precomandar en casseta en çò deu labèl nòvayorkés Fiadh Productions. Que serà lèu disponible en CD sus la pagina deu grop e dens los concèrts.

Que poiratz gausir en dirècte d’Eyes of Simurg lo 2 de mai qui arriba a l’Axis Musique de Tolosa.

EYES OF SIMURGH. Legendas Ruraus. Fiadh Productions, 2024. 7 pistas. 

• Bandcamp: eyesofsimurgh.bandcamp.com
• Encyclopaedia Metallum: https://www.metal-archives.com/bands/Eyes_of_Simurgh/3540402337
• Instagram: instagram.com/eyes_of_simurgh