Lo panatòri de la placa commemorativa de Joan Pau Verdier, pendent las jornadas occitanas de Chancelada (Peiregòrd Central), a suscitat d'indignacion dins la comuna, çò rapòrta Sud-Ouest. L'esplanada Joan Pau Verdier, inaugurada lo dissabte 6 d'abril, es estat lo teatre d'aquel acte deplorable, privant aital la vila de l’omenatge meritat al cantador occitan defuntat en 2020.

L'òbra realizada per l'artista peiregòrd José Correa, desvelada pendent la ceremònia, foguèt raubada dins la nuèch que seguissiá la ceremònia. La municipalitat, atupida per aquel acte, a decidit de lo denonciar en justícia e considèra de comandar una novèla placa en remplaçament. Semblariá que lo raubaire aguèsse agit per de motivacions encara desconegudas, benlèu per simpla cobesiá o dins l'espèr de possedir una pèça unica.

Malgrat aquel trist eveniment, la jornada d'omenatge a Joan-Pau Verdier se tenguèt pasmens dins un ambient calorós e convivial. Aquel omenatge, qu’aviá luòc dins l’encastre de las primièras jornadas occitanas de la comuna, “Chança en Òc”, dispausèt de la preséncia de pròches del cantador, d'artistas locals e d'elegits. La ceremònia foguèt marcada per de concèrts, de danças tradicionalas, d’animacions e la projeccion del documentari de Nicolas Puech Contradas, sus Verdier e la cultura occitana.