Ua estapa simbolica de La Passem, la corsa en Gasconha qui he vàler la lenga occitana, que s’aprèstan a préner plaça au còr de París, çò rapòrta La République des Pyrénées. Qu’ei un rescontre preparat peus bearnés qui demoran a la capitau de França entau dimenge 29 d’abriu qui arriba au Parc Montsouris, a 10h deu matin. L’amassada que vibrarà au ritme de las cantèras a partir de mieidia.

La corsa principau que’s debanarà deu 30 d’abriu au 4 de mai, e que va religar Tarba au Mont de Marçan. Qu’aurà un itinerari de 1100 km per cinc departaments, en auherint atau ua vertadèra preséncia de l’occitan dens los parçans e vilatges qui va traversar. Aquera corsa, iniciada en 2018 per l’associacion Ligams, qu’a la mission de méter en lutz e promòver la lenga occitana, shens competicion ni cronomètre, mes dens un ambient conviviau e inclusiu.

Joan Breç Brana, deu Congrès Permanent de la Lenga Occitana, qu’a soslinhat au medish jornau l’importància d’aquera corsa de relhèva entà la promocion e la preservacion de l’occitan de Gasconha. Com responsable deu pòl “lenga e societat”, qu’ei a las prumèras lòtjas entà observar las dinamicas lingüisticas qui faiçonan lo païsatge culturau contemporanèu.

Au moment on las lengas minorizadas lutan entà la lor subervivéncia, aquera corsa que representa un engatjament hòrt. Dab mei de 200 benevòls implicats dens l’organizacion de l’eveniment, La Passem 2024 que s’assolida annada après annada com ua de las hèstas màgers dens lo calendèr occitan.

Àudio de Votz.eu