capçalera campanha

Actualitats

InternacionalLengaPolitica

Acusan lo cònsol màger de Perpinhan de descatalanizar la fèsta de Sant Jòrdi

L’associacion Perpinhan la Catalana acusa lo neofaissista francés Louis Aliot d’invisibilizar la festivitat, e denóncia la politica del cònsol màger qu’a per mira l’eliminacion progressiva de l’identitat catalana de la vila

A l’apròchi de Sant Jòrdi, celebrat ongan al convent dels Dominicans, l’associacion Perpinhan la Catalana denóncia una descatalanizacion d’aquela fèsta emblemática, çò rapòrta L’Indépendant. Los membres de l’associacion acusan lo cònsol màger del partit neofaissista francés Recampament Nacional, Louis Aliot, d’escarnir volontàriament l’aspècte tradicional e identitari de la festivitat.

La comuna de Perpinhan prevei de festejar Sant Jòrdi del 23 al 27 d’abril. Pasmens, segon l’associacion, aquela tradicion, que celèbra lo libre, la ròsa e los amoroses, auriá perdut totalament son identitat catalana dempuèi l’eleccion de Louis Aliot, çò declara Jaume Roure, president de l’associacion.

Mentre que Sant Jòrdi es de costuma una celebracion populara qu’a luòc per carrièras, se tendrà ongan al convent dels Dominicans a Perpinhan. Aquela decision a suscitat la reprobacion de l’associacion, qu’i vei una temptativa deliberada d’invisibilizar tot signe de catalanitat. “Totas las festivitats son concentradas dins un sol bastiment claus. Una decision qu’a per mira d’invisibilizar tot signe de catalanitat, presa per un cònsol màger que vòl far desaparéisser aquela cultura progressivament”, çò estima Brice Lafontaine, secretari de l’associacion.

Chantal Gombert, tanben membre de l’organizacion, deplora aquela evolucion: “Remembratz-vos, fa qualques annadas, lo Cai Vauban èra plen de libres e de flors, aquò atrasiá fòrça mond dins lo centre vila. Es pas anecdotic al temps dificil que sèm. Ongan,  l’impacte serà fòrça diferent.”

Dempuèi son intrada en foncion coma cònsol màger de Perpinhan en julhet de 2020, Aliot a lançat una campanha per eliminar la catalanitat de la vila del Rossellon, coma la supression de la devisa Perpinhan la Catalana de las armas de la vila o l’imposicion de la bandièra francesa sul mast del Castellet.

 

 

 

 

 

 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

Pitèas
2.

Efectivament a Barcelona tanben lo cònsol pretendudament socialista elegit amb las voses de la drecha nacionalista espanhòla (çò que se'n ditz un catanhòl) descatalaniza tanben la Sant Jordi. Pòt prener conselh al prèp de l'Aliot que el a l'experiéncia d'annadas de descatalanizacion.

  • 13
  • 0
Jòrdi Caldentey Manacòr (Malhòrca)
1.

La comuna faita de partits espanhòls e catanhòls de Barcelona vòl tanben i decatalanizar Sant Jòrdi: a faita ongan un aficha sens las quatre barras de la senhera, sens la crotz de Sant Jòrdi ni cap de simbòl catalan. Una Rambla plurimulticulti, amb de gents d'arreu del mond, es la Barcelona ideala de la comuna catanhòla d'esquèrra.

  • 14
  • 0

Escriu un comentari sus aqueste article