Cap de país de l’Union Europèa a pas importat de la Nòva Zelanda de produches lechièrs contaminats amb un bactèri que pòt causar lo botulisme. Los lòts contaminats son pas arribats e, doncas, “a pas calgut prene de mesuras de precaucion per ara, e mai la Comission Europèa (CE) e de las autoritats de la Nòva Zelanda son en contacte”, çò expliquèt als mèdias lo pòrtavotz de per Santat de la CE, Frédéric Vincent.
 
L’alarma comencèt après que l’entrepresa neozelandesa Fonterra, una de las exportairas mai grandas del Mond, reconeguèsse qu’aviá vendut a uèch clients un concentrat de proteïna de lactoserum que podiá èsser contaminat dins un de sos sits. Aquel compausant es emplegat en l’alimentacion infantila, e en de bevendas.
 
Lo Ministèri de las Indústrias Primàrias de la Nòva Zelanda a afirmat que las partidas en marrit estat foguèron exportadas vèrs Austràlia, China, Malàisia, Vietnam, Tailàndia e l’Arabia Saudita.
 
Fonterra remarca que los sieus produches son segurs perque cap d’eles conten pas aquel concentrat. Ça que la, qualques clients de la companhiá an començat de prene de precaucions. En China, quatre entrepresas retirèron la dimenjada passada qualques produches Fonterra dels supermercats. Dins un comunicat, las autoritats chinesas an informat que Coca-Cola es tanben importaira de Fonterra, mas s’es pas confirmat se la multinacionala a començat de retirar sos produches. Russia e Tailàndia an ordenat la retirada del lach de polvera amb la meteissa origina.
 
Lo grop Danone a retirat de divèrses païses asiatics de lòts de lach de polvera per enfants de las marcas  Dumez e Karicare. La rason es que qualques unes d’aqueles lòts presentavan un risc de botulisme e provenián de Fonterra.
 
Aquò es lo segond cas de contaminacion alimentària qu’enregistra ongan Fonterra, après qu’en genièr se trobèsse dins qualques produches de rèstas de diciandiamida, un inibitòri de nitrats emplegat dins de fertilizants.