Las òbras pel tresen tròç del teleferic sul glacièr de Girosa (Oesen) començaràn pas encara, çò rapòrta Reporterre. Malgrat de trabalhs inicials que se devián entamenar aquesta prima, lo projècte sembla actualament al ponch mòrt.

Sièis meses après l’installacion d’una zòna a defendre (ZAD) pels Soslevaments de la Tèrra per blocar la debuta de las òbras, los militants demòran vigilants sus la possibilitat que los buldosèrs comencen las operacions après la fonta de las nèus, sens qu’una data precisa de represa siá anonciada. Lo vilatge de la Grava es actualament cabussat dins l’incertitud, amb d’informacions contradictòrias sul calendièr dels trabalhs.

La societat Sata Group, esplechaira del domeni esquiable, e sa filiala SATG (Societat d’Amainatjament Toristic de la Grava), titulara del permís de construccion, an pas desirat de respondre a las questions dels jornalistas de Reporterre. Pasmens, de sorsas pròchas del dorsièr an confirmat que las òbras son a l’ora d’ara en pausa, amb de trabalhaires desplegats sus d’autres prètzfaches.

Los obstacles a la represa de las òbras son nombroses, sustot los recorses juridics de las associacions ecologicas contestatàrias, que remeton en question la validitat del permés de construccion. En mai d’aquò, de problèmas financièrs potencials, e mai lo naut còst del desmontatge d’un autre teleferic defectuós als Dos Alps, poirián tanben retardar lo projècte.

Aquel projècte de teleferic devesís la comunautat locala entre los que favorisson lo desvolopament toristic e los que preferisson de preservar l’environament montanhòl. La bastison del teleferic a per tòca de remplaçar un vièlh telesquí obsolet e de dobrir lo glacièr de Girosa a un mai larg public, mas suscita de debats apassionats pertocant son impacte sus l’ecosistèma fragil de la region.