A l’escasença de la fèsta nacionala de Sardenha, que se commemorèt ièr 28 d’abril, lo cantador catalan Adrià Mor a publicat una nòva cançon entitolada “Terras de abbundu” (Tèrrasd’abondància) interpretada en las lengas pròprias de l’illa, valent a dire sarde, catalan alguerés, ligur tabarquin, còrs gallurés e turritan. S’agís d’una adaptacion de PasturesofPlenty de Woody Guthrie, escricha en 1940 per denonciar lo racisme contra los migrants.

La version d’Adrià Mor desplaça los luòcs mençonats dins la cançon originala (coma Califòrnia e Arizòna) dins lo contèxt actual de la “casamata europèa” (Gibartar, Crotona, la mar Egèa) per metre en lum la situacion coloniala de Sardenha e denonciar la tragèdia dels migrants en Mediterranèa, una mar tresmudada en cementèri per l’accion dels govèrns europèus.

Lo videoclip de la cançon, produch per Roble Factory (de l’Alguer), foguèt enregistrat a Long Beach, en Califòrnia, a Joshua Tree e en Sardenha, amb de referéncias al libre d’Steinbeck The Grapes of Wrath (Los Rasims de la Colèra), als messatges de Guthrie e al movement Black Lives Matter. Lo vidèo compren un dessenh de l’illustrator catalan Tere Borrell amb lo messatge “Sardinian Lives Matter”.

Adrià Mor a collaborat amb d’expèrts per traduire la cançon en totas las lengas insularas e a sostitolat lo vidèo en de lengas non egemonicas coma lo catalan, lo galés, lo basco, lo curd o l’esperanto. Una version en occitan seriá benvenguda per l’autor se qualqu’un li’n poguèsse fornir la traduccion.

Aquela iniciativa coïncidís amb la sortida de l’album novèl d’Adrià Mor, entitolat De Sardenya a Califòrnia, dont a presentat una avantprimièra de qualques extraches sus son sit www.adriamusic.cat.

Lo Jorn de Sardenha, instituït en 1993, commemòra la rebellion populara del 28 d’abril de 1794, quand lo vicerei Vincenzo Balbiano deguèt quitar l’illa a causa del refús del govèrn turinés de reconéisser los dreches istorics del pòble sarde. Aquela fèsta es un simbòl de la glòria e de l’identitat del pòble sarde dins sa lucha per la reconeissença e l’autodeterminacion.