Lo Conselh de Cornoalha ven d’adreiçar una requista al govèrn britanic per qu’autrege a la lenga cornica lo meteis nivèl de reconeissença e de proteccion qu’aquel conferit al gaelic escocés, a l’irlandés e al galés. Segon çò que rapòrta Nationalia, aquela demanda emana dels dirigents dels cinc partits politics del Conselh, qu’agisson en nom dels 87 membres de l’assemblada.

A l’ora d’ara, lo cornic es la sola lenga del Reialme Unit a beneficiar d’una proteccion limitada, definida dins la Partida II de la Carta Europèa de las Lengas Regionalas o Minoritàrias (CELRoM). Per quant a eles, l’irlandés, lo gaelic escocés, lo galés e lo manés son promoguts dins l’encastre de la Partida III. Aquela inegalitat a empench lo Conselh a exigir una inclusion del cornic dins la Partida III, çò qu’incitariá las autoritats britanicas a prene de mesuras concretas per promòure la lenga dins divèrses domenis tals coma l’educacion, los tribunals, los servicis publics, los mèdias e la vida culturala e economica.

Aquela revendicacion interven a l’escasença del desen anniversari de la reconeissença del pòble cornic coma minoritat nacionala, una estapa inscricha dins la Convencion-Quadre per la Proteccion de las Minoritats Nacionalas. Es de notar que tant la Convencion coma la Carta son d’instruments del Conselh d’Euròpa.

Lo cornic es una lenga celtica del grop britonic, coma lo galés e lo breton. Après aver perdut sos locutors natius a la fin del sègle XVIII, coneis ara un procès de reviudacion dempuèi la debuta del sègle XX. Segon lo recensament de 2021, mai o mens 500 personas en Cornoalha declaran que lo cornic es lor lenga principala, mentre que mai o mens 3 000 personas possedisson de competéncias en aquela lenga.